«Azamattarǵa arnalǵan úkimet» memlekettik korporatsiiasy úileri tótenshe jaǵdai kezinde jarylystan zardap shekken Arys turǵyndarynyń qujattaryn tegin rásimdep jatyr, dep habarlady memlekettik korporatsiianyń baspasóz qyzmeti.
Maýsym aiynyń sońynda oryn alǵan jarylys saldarynan buzylǵan jáne zaqym kelgen ǵimarattardy jappai qalpyna keltirý jáne jóndeý jumystarynyń júrgizilýine bailanysty Arys qalasynda jer kadastry jáne jyljymaityn múlik salasy boiynsha qyzmetter kólemi kúrt ósken. Qazirgi ýaqytta joǵary suranysqa ie bolyp otyrǵan osy qyzmetter memlekettik korporatsiiamen tegin kórsetilýde.
«Azamattarǵa arnalǵan úkimet» memlekettik qyzmetterdiń ýaqytyly kórsetilýin qamtamasyz etý maqsatynda Arys qalalyq bólimshesine Shymkent qalasy, Qyzylorda, Jambyl oblystarynan jáne Túrkistan oblysynyń aýdandyq bólimderinen 25 qyzmetkerdi kómekke jumyldyrdy. Shilde aiynyń basynan korporatsiia óz esebinen aqysyz negizde 858 tehnikalyq tólqujat, 3328 menshik iesi týraly málimet, 476 jyljymaityn múliktiń tehnikalyq tólqujattaryn jáne quqyq belgileitin qujattyń muraǵattyq kóshirmesin berip, jyljymaityn múlik derekqoryndaǵy qatelerdi túzetý jumysy boiynsha 799 turǵynǵa qyzmet kórsetti. Al jalpy esepti merzimde (24 maýsym – 12 tamyz) Arys qalalyq bólimimen kórsetilgen memlekettik qyzmetter sany 17 myńǵa jetti», - delingen taratylǵan aqparatta.
Esterińizge sala keteiik, Azamattarǵa arnalǵan úkimettiń Arys qalasy boiynsha bólimi oryn alǵan tótenshe jaǵdaidan keiin azamattarǵa qyzmet kórsetýin toqtatpai, dalalyq jaǵdaida, arnaiy qurylǵan shtab quramynda jumys istedi. Turǵyndarǵa memlekettik qyzmetter boiynsha keńes berilip, aqparattyq anyqtamalar men bastapqy qujattar paketi usynyldy. Qajet bolǵan jaǵdaida mamandar azamattardy qujattandyrý úshin kóshi-qon qyzmeti basqarmalarymen jedel ózara is-qimyl jasap, tiisti jumystar atqardy.
Sondai-aq, Arys qalalyq HQO qalanyń áleýmettik nysandarynyń arasynda alǵashqylardyń biri bolyp az ýaqyt ishinde ǵimaratyn jóndeýden ótkizip, óz jumysyn qalypty jaǵdaida qaita júrgizgen bolatyn.
