Búgin tańerteńnen bastap Arys qalasynyń turǵyndary barlyq evakýatsiialyq pýnktterden úiine oralyp jatyr, dep habarlaidy QazAqparat.
Arys turǵyndaryna elimizdiń ár óńirinen gýmanitarlyq kómek retinde jetkizilgen kiim-keshek pen azyq-túlikti taratylýda.
«Arys, biz birgemiz» aktsiiasy aiasynda elimizdiń barlyq turǵyndarynan úlken kómek kórsetildi. Pavlodar oblysynan 91 tonna túrli qajetti zattardy alyp keldik, basym bóligi azyq-túlik. Pavlodarlyqtar bir aýyzdan atsalysyp qoldarynan kelgen kómekti aiamady», - deidi kásipker Baýyrjan Bekmyrzaev.
Arysqa oralǵan jergilikti turǵyndar eń aldymen barsha qazaqstandyqtarǵa kómek kórsetkenderi úshin alǵystaryn bildirdi. Keibir turǵyndar óz úileriniń jai-kúiin tekserip jatty.
«Men jarylys bolǵan kúni Almatyda edim. Biraq úide týysqandarym, balalar, nemerelerimdi qosqanda 10 shaqty adam boldy. Eki nemerem balabaqshada bolatyn. Olardy kórshilerim alyp ketipti. Sondyqtan ol kisilerge aitar alǵysym sheksiz. Bizdiń qaiǵymyzǵa ortaqtasyp, basymyzǵa qiyndyq túsken kezde búkil qazaqstandyq kómekke keldi. Soǵan rizamyn. Ákimdikten adamdar kelip, úidi qaita qalpyna keltirip beremiz dep jatyr», - deidi Arys qalasynyń turǵyny Qanat Siqym.
Búgin kommýnaldyq sharýashylyq qyzmetiniń mamandary Arys qalasyndaǵy elektr jelisi men aýyz sý júielerin iske qosýda.
Sondai-aq, Arys stansasyndaǵy barlyq baǵyttar boiynsha temirjol qatynasy qalpyna keltirildi.
Veterinariia qyzmeti dezinfektsiialaý maqsatynda ólgen úi janýarlaryn taýyp, ony joiý jumystaryn júrgizýde.
Sondai-aq, 2019 jyldyń 27 maýsymynan bastap Densaýlyq saqtaý ministrliginiń sanitarlyq-epidemiologiialyq qyzmeti, 155 adam men 22 birlik tehnikamen 41 ýchaske boiynsha tekserý jáne dezinfektsiialyq jumystar júrgizilýde.
