Arys turǵyndaryna 100 myń teńge ótemaqynyń berýi úshin bank kartalary taratyla bastady, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
«100 myń teńge tirkeýde turǵandarǵa túgel taratylady. Anyqtalǵan 55 myńnan astam adam 12 tamyzdan bastap qarajatqa qol jetkizedi. Búgingi tańda eki aýyldyq eldi meken men Arys qalasyndaǵy 17 sektorda bank kartalary taratylýda. Qyzylorda, Jambyl jáne Shymkent qalasynan «Halyq bankiniń» 120 qyzmetkeri Arysqa arnaiy kelip jumys júrgizýde», delingen habarlamada.
Túrkistan oblysy ákiminiń orynbasary Joldymurat Amanbaev, aqshany alýdyń tártibin túsindirdi.
«Osy ýaqytta 33 myń bank kartochkasy jasaldy. Elimiz egemendigin alǵannan beri dál bulai, bir aidyń ishinde osynshama qujat jinalyp, 33 myń kartochkany daiyndaý degen bolǵan emes. Qazirgi tańda sol daiyn bolǵandary taratylyp jatyr. Biraq ázirge aqsha salynǵan joq. Iaǵni, 100 myń teńgeni 12 tamyzdan bastap ala alady. Al qazirgi negizgi jumys kartany taratý. Demek, barlyǵy túgel qol jetkizgende aqshany túsiremiz. Eń kóp 9 sektorda 3 771 qujat jinalǵan. Qalany kóshe-kóshege bóldik», – dedi oblys ákiminiń orynbasary J.Amanbaev.
Eldi sabyrǵa shaqyrǵan jaýapty basshylar, turǵyndardyń tolǵandyrǵan suraqtaryna jaýap beretin, arnaiy komissiia jumys jasap jatqanyn jetkizdi. Al tizimge kirmei qalǵan oqýshylar, mektepter arqyly anyqtalyp jatqany jariia etildi.
Aita keteiik, ótemaqy qarjyny atalmysh banktiń kez kelgen bankomatynan alýǵa bolady. Qarjynyń túsken nemese túspegenin anyqtaý úshin, kartochkany bankomatta 3-retten artyq qoldanýǵa bolmaidy. Sebebi 3 retten artyq qoldanǵan jaǵdaida bank komissiia tólemi ustalady. Sonymen qatar sot sheshimimen qaryzdary bolǵan azamattarǵa tólem kartalary ashylmaidy. Mundai jaǵdaida azamat senimdi ókiline notarialdy senim bildire otyryp, ótemaqyny senim bildirgen ókili arqyly alýyna bolady. Al úilerinde bolmaǵan azamattar kartalaryn 2019 jyldyń 15 tamyzynan bastap, Arys qalalyq «Halyq bank» filialdarynan alady. Bank kartasyna túsken qarjydan banktiń komissiialyq tólemderi ustalmaidy.
Jalpy, búginde tańda Arys qalasynda atalmysh banktiń 12 bankomaty qoiylǵan. Sonymen qatar qosymsha taǵy 7-8 bankomat ornatylmaq.
