Arys qalasy turǵyndary 100 myń teńge alamyz dep ákimdiktiń esigin tozdyryp qajeti joq. Árbir turǵyn týraly maǵlumat ákimdik tarapynan jinalatyn bolady. Bul týraly búgin BAQ ókilderimen ótken brifingte Túrkistan oblysy ákiminiń orynbasary Joldymurat Amanbaev málimdedi, dep habarlaidy QazAqparat tilshisi.
Joldymurat Amanbaevtyń aitýynsha, Arystyq turǵyndarǵa 100 myń teńgeden berý úshin 4 mlrd 478 mln teńge qajet. Onyń 2 mlrd teńgesin respýblikalyq biýdjetten bólý qarastyrylyp otyr. Qalǵan 2 mlrd 478 mln teńge qarajatty oblystyq biýdjetten bólý qarastyrylǵan. Ol qarjylardy biýdjetten bólý úshin oblystyq máslihat jinalysyn ótkizý qajet.
«100 myń teńge bólý úshin eki aptanyń ishinde 44 myńnan asa adam týraly málimet jinaimyz. Sol jarylys bolǵan kúni tirkeýde turǵan azamattardyń tizimin jasaimyz. Ol úshin ákimdiktiń esigin tozdyryp qajeti joq. Sebebi, eshkimnen qujat jinamaimyz. Ol jumysty biz júielep júrgizetin bolamyz. Sol málimetke qarsy 25-ine deiin daiyndap bolsaq degen jospar bar. Barlyq túsken málimetti biz túgel tekserip shyǵamyz. Otbasynda áke sheshesi men bes balasy bar bolsa, balalardyń ata-anasynan suraimyz. Aqshany kimge aýdarý kerektigin. Olar kimniń esep shotyna aqshany aýdarý kerektigin ózderi sheshetin bolady. Ata-analardan bul týraly ótinish jazdyryp alamyz», - dedi oblys ákiminiń orynbasary.
Joldymurat Amanbaevtyń sózinshe, bul jumystarǵa «Qazposhta» mekemesi men «Halyq banki» jumyldyrylatyn bolady. Oblys ákimi orynbasarynyń aitýynsha kúni búginge deiin Arys qalasy turǵyndaryn qoldaýǵa arnalǵan qorǵa 1 mlrd 219 mln teńgeden astam qarajat tústi. Bul qarjydan ázirge bir tiyn da jumsalmaǵan.
