Arys qalasynda tórt áskeri qyzmetshi jaralandy, dep habarlaidy "Ult aqparat" QR Qorǵanys ministrligine silteme jasap.
«Búgin Arys qalasynyń aýmaǵynda áskeri qyzmetshiler qoima aýmaǵyn oq-dáriniń bólshekterinen tazartýǵa qatysty josparly jumysty júrgizý kezinde qoparylys boldy. Tótenshe jaǵdaidan keiingi joiý jumystaryn júrgizgen 4 kelisim-shart áskeri qyzmetshisi jaraqat aldy. Olardyń barlyǵy áskeri bortpen Almaty qalasyndaǵy Qorǵanys ministrliginiń áskeri klinikalyq gospitaline jetkizildi», delingen habarlamada.
Ministrliktiń baspasóz qyzmetiniń málimetinshe, osy oqiǵa boiynsha Áskeri politsiia tekserý júrgizip jatyr. Sondai-aq olar turǵyndarǵa keler qaýip joq ekendigin qaperge saldy.
«Turǵyndarǵa eshqandai qaýip joq, jaǵdai tolyq baqylaýǵa alynǵan. Eske sala ketsek, qala aýmaǵyn jáne oq-dárini saqtaý nysandaryna jaqyn aýmaqtardy tazartqannan soń oq-dárilerdiń negizgi bólikteri ásker bólim aýmaǵynda tur, turǵyndarǵa eshqandai qaýip tónip turǵan joq. Sonymen birge, áskeri bólimdegi áskeri qyzmetshilerdiń oq-dári bólikterin jinaý jáne joiý jumystaryna belgili bir ýaqyt kerek. Osyǵan bailanysty Qorǵanys ministrligi resmi málimet taratýshy organdarǵa senip, rastalmaǵan aqparatty taratpaýdy suraidy», delingen habarlamada.
Sondai-aq Qorǵanys ministrligi turǵyndarǵa kúdikti zattardy taýyp alǵan jaǵdaida dereý 102 nómirine habarlasýdy, ári óz betinshe eshqandai áreket jasamaý kerektigin eskertedi.
