Búgin Ordabasy aýdany, Aqjol aýylyndaǵy jedel shtabta Arystaǵy tótenshe jaǵdaidan keiingi atqarylǵan jumystar jáne qalanyń qazirgi jai-kúii jóninde baspasóz máslihaty ótkizildi, dep habarlaidy QazAqparat.
Óńirlik jáne respýblikalyq BAQ ókilderi qatysqan jiynda Túrkistan oblysynyń ákimi Ómirzaq Shókeev, «Nur Otan» partiiasy Tóraǵasynyń birinshi orynbasary Máýlen Áshimbaev, QR Qorǵanys ministriniń orynbasary Baqyt Qurmanbaev, Tótenshe jaǵdailar jónindegi komitet tóraǵasy Vladimir Bekker, elimizdiń bas sanitary Jandarbek Bekshin, prokýratýra jáne veterinariia salasynyń ókilderi qatysty. Spikerler Arys turǵyndaryn mazalap júrgen ótkir suraqtarǵa jaýap berdi.
QR Qorǵanys ministriniń orynbasary Baqyt Qurmanbaev Arys qalasynda órt sóndirilgenin málimdedi.
«Qaladaǵy negizgi kósheler men alańdardyń bári tekserilip, tazalandy. Bizdiń saper mamandarymyz 500-dei snariad qaldyǵy men jarylǵysh zattardy taýyp, zalalsyzdandyrdy. Qorǵanys ministrligi tarapynan turǵyndardyń qaýipsizdigin saqtaý baǵytynda tiisti sharalar atqarylýda. Endi biz qaladaǵy barlyq úidiń aýlasyn tolyq tekseremiz. Dál qazir qalaǵa eshkimdi kirgize almaimyz. Buǵan turǵyndardyń túsinistikpen qaraýyn ótinemiz. Arystyqtardyń qaýipsizdigi basty nazarda bolýy tiis» - dedi ol.
Tótenshe jaǵdailar jónindegi komitet tóraǵasy Vladimir Bekker qaýip bulty seiilgenin, alańdaýǵa negiz joq ekenin jetkizdi.
«Keibir aqparat quraldarynda adamdar iz-tússiz joǵaldy degen aqparat tarady. Bul negizsiz ekenin málimdeimin. Bastapqyda kóshý barysynda turǵyndar bir-birine habarlasa almai, qiyndyqtar kezdesken bolatyn. Qazir ol másele sheshilip, týystar da, balalar da tabylyp jatyr. Sonymen birge áleýmettik jelilerdegi iri jarylys bolatyny, sý qoimalardan sý jiberiletini týraly qaýesetter de jalǵan. Qazirgi tańda oblystaǵy sý qoimalary turaqty rejimde jumys istep tur jáne ol jumys rejimin ózgertý týraly jospar joq. Sondyqtan resmi rastalǵan derekterge ǵana senýlerińizdi suranamyz», - dedi ol.
Al elimizdiń bas sanitary Jandarbek Bekshin Arys qalasynda radiatsiianyń mólsheri turaqty deńgeide ekenin aitty.
«Eń birinshi bizdiń mamandar Arys qalasynda dezinfektsiia jumystaryn júrgizedi. Qoǵamdyq oryndar, qoqys konteinerleri, nysandar tolyq tazalanady. Qaladaǵy aýyz sý júiesi qatań qadaǵalanady. Sý quramy, qubyrlar tekseriledi. Evakýatsiialyq oryndarda da mamandarymyz jumys istep jatyr. Jalpy Túrkistan oblysynda epidemiologiialyq jaǵdai turaqty», - dedi.
Sondai-aq baspasóz máslihatynda veterinar mamandar Arystaǵy úi aýlasynda qalǵan tórt-túlik boiynsha jumys júrgizetini aityldy. Ólgen mal zalalsyzdandyrylyp, zańǵa sáikes ótemaqy berý joldary qarastyrylady.
Oblys ákimi Ómirzaq Shókeev aldaǵy úsh kúnde evakýatsiialyq qabyldaý ortalyqtarynyń jumysy kúsheitilip, gýmanitarlyq kómek berý sharasy jalǵasatynyna toqtaldy. Osy igi iske atsalysyp júrgen barsha azamattarǵa alǵysyn aita kele Arys qalasyndaǵy nysandar qalpyna keltirilip, turǵyndardyń jaǵdaiy jasalatynyn jetkizdi.
