Arys qalasyn qalpyna keltirý jumystary qarqyndy júrip jatyr. Búgingi tańda 17 sektorda qolǵa alynǵan qurylys jumysynyń birshama bóligi aiaqtalyp, azy qalǵan, dep habarlaidy "Ult aqparat" oblys ákiminiń baspasóz qyzmetine silteme jasap.
Máselen, Jambyl oblysy 3 sektordaǵy 312 úidi berilgen merzimde 100 paiyz jóndep bitemiz dep otyr. Qazirgi tańda onda jumysqa 438 adam jumyldyrylǵan. Bul týraly jýrnalistermen ótken baspasóz máslihatynda Jambyl oblysy ákiminiń orynbasary Erkebulan Daýylbaev málimdedi. Jalpy árbir sektordaǵy jumystardy júrgizý úshin oblys, qalalardan 7576, oblys aýdandarynan 315 jumysshy tartylǵan.
«Arys qalasynda jańadan 107 jeke turǵyn úi men 1 kópqabatty úidi qaita soǵý jumystary júrgizilýde. Zerdeleý jumystarynyń nátijesinde 7252 jeke turǵyn úi men 98 kópqabatty úige aqaý aktileri jasalǵan. Al 4669 jeke úi men 88 kópqabatty úide jóndeý jumystary bastalǵan bolatyn. Qalany qurylys qaldyqtarynan tazartý maqsatynda 117 tehnika jumyldyrylǵan, shyǵarylǵan qoqys kólemi 30551 tonnany quraidy», – dedi Arys qalasanyń ákimi Murat Qadyrbek.
Aita ketý kerek, Arys qalasynda 66 áleýmettik nysandy qalpyna keltirý «Samuryq-Qazyna» ál-aýqat qoryna tapsyrylǵan. Onyń 54-i - bilim nysandary, 8-i - densaýlyq saqtaý, 4-ýi - sport nysandary. Áleýmettik infraqurylym boiynsha 66 nysanda qurylys jumystary qarqyndy júrgizilýde. Tiisti qurylys jumystaryna 1097 qurylysshy maman tartylǵan.
Búgingi tańda Arysta 2161 baspananyń jóndeý jumystary bitken.
