3 shildedegi jaǵdai boiynsha Arys qalasynda 136 turǵyn úi qalpyna keltirildi. Taǵy 571 úide jóndeý jumystary júrip jatyr. Bul týraly Indýstriia jáne infraqurylymdyq damý ministrligi habarlady.
Arys qalasyndaǵy úilerdiń 85%-y jóndeýdi qajet etedi, al qalada jumys isteitin qurylys kompaniialarynyń sany 118-ge deiin artty. Búgingi kúni turǵyn úidi qalpyna keltirý boiynsha aýqymdy is-sharaǵa 1546 qurylysshylar qatysyp, 86 arnaiy tehnika tartyldy.
Vitse-ministr Qaiyrbek Óskenbaev bastaǵan jumys toby qazir Arys qalasynda. Jaqynda ol Arys qalasyndaǵy barlyq úilerdi baqylaýǵa alatynyn jáne kúndelikti monitoringte ustaitynyn habarlady.
«Biz árbir turǵyn úidi turaqty baqylaýǵa aldyq. Eger tipti jeldetkish nemese terezeniń áinegi synǵan bolsa da, biz bul jaittardyń barlyǵyn eskerdik jáne jóndeýge muqtaj turǵyn úi nysany retinde tirkeýge aldyq. Sondyqtan árbir úi boiynsha-jeke tásil, bir jerde áinekteý, bir jerde shatyrdy aýystyrý jumystaryn júrgizý qajet. Keibir úilerdi buzý jáne qaita salý kerek. Qazir shyǵyn somasyn jáne qalpyna keltirý úshin qajetti qarajatty anyqtaý maqsatynda baǵalaý júrgizemiz»,-dedi Qaiyrbek Óskenbaev.
Arys 17 sektorǵa bólinip, árqaisysy elimizdiń barlyq óńirleri men respýblikalyq mańyzy bar qalalaryna bekitip berildi. Turǵyn úilerdi qalpyna keltirý boiynsha shyǵyndardyń bir bóligin bekitilgen jergilikti atqarýshy organ ózine alady, al shyǵyndardyń qalǵan bóligi respýblikalyq biýdjet qarajaty esebinen jabylady. Kún saiyn saǵat 19.00-de barlyq ákimdikter turǵyn úi qoryn jóndeý boiynsha atqarylǵan jumystar týraly baiandaidy.
Sondai-aq, qalada barlyq buzylǵan infraqurylymdy: injenerlik kommýnikatsiialar men joldardy qaita qurý jumystary júrgizilýde. Bul maqsatqa Úkimet rezervinen qarajat bólindi.
Áleýmettik infraqurylym nysandaryn qalpyna keltirý «Samuryq-Qazyna» AQ qarajaty esebinen júrgiziledi, al Arys qalasynyń kásipkerlerine «Atameken» UKP arqyly qarajat baǵyttaityn iri biznes ókilderi kómektesýge daiyn. Elbasynyń jáne Memleket basshysynyń tapsyrmasy boiynsha barlyq búlingen jáne buzylǵan obektiler 2019 jyldyń 1 tamyzyna deiin tapsyrylýy tiis.
