Parlament Senatynyń jalpy otyrysynda Arys qalasyndaǵy nysandardy qalpyna keltirýge qansha qarjy bólinetini aityldy, dep habarlaidy "Ult aqparat".
Jalpy otyrys barysynda senator Áli Bektaev Úkimet rezervin 72,2 mlrd teńgege ulǵaitý eskerilip otyrǵanyn aita kele, osy qarjynyń qai bóligi Arystaǵy tótenshe jaǵdai saldaryn joiýǵa jumsalatynyn surady.
Óz kezeginde QR Premer-Ministriniń birinshi orynbasary-Qarjy ministri Álihan Smaiylov Arys qalasyna qajetti qarjy boiynsha aldyn ala esepteýler júrgizilgenin atap ótti.
«Arys qalasy boiynsha 1 shildedegi aldyn ala esepteýlerge sáikes, 34,5 mlrd teńge kerek. Sonyń ishinde árbir turǵynǵa 100 myń teńge mólsherinde aqshalai ótemaqy tóleý úshin 4,5 mlrd teńge eskerilgen. Osy oraida Úkimet rezervinen 2 mlrd teńge, Túrkistan oblysy biýdjetinen 1 mlrd teńge jáne qaiyrymdylyq kómek esebinen 1,5 mlrd teńge qamtylǵan», - dedi ministr.
Onyń sózine qaraǵanda, 7 709 turǵyn úidi qalpyna keltirý qarastyrylǵan. Sonyń ishinde 49 úi qiraǵan.
«19,2 mlrd teńge kerek. Onyń 50 paiyzy basqa óńirlerdiń biýdjeti esebinen bolady, al qalǵan 50 paiyzy Úkimet rezervinen bólinedi. 66 áleýmettik nysandy qalpyna keltirýge 7 mlrd teńge kerek. Bul turǵyda 54 bilim berý, 8 densaýlyq saqtaý, 4 sport nysany qamtylady. 6 mlrd teńgesin «Samuryq-Qazyna» qory bóledi jáne 1 mlrd teńge biznes qaýymdastyqtan keledi», - dep túsindirdi Úkimet basshysynyń birinshi orynbasary.
Sýmen jáne elektr qýatymen, jylýmen jabdyqtaý infraqurylymyn jóndeý úshin 2,2 mlrd teńge Úkimet rezervinen bólinedi. Ákimshilik 34 ǵimarat úshin 1,7 mlrd teńge kerek, ol da Úkimet rezervinen bólinedi.
«Nátijesinde, Úkimet rezervinen 15,5 mlrd teńge, jergilikti biýdjetterden 10,6 mlrd teńge, «Samuryq-Qazyna» qorynan 6 mlrd teńge, demeýshilik jáne qaiyrymdylyq kómek esebinen 2,5 mlrd teńge josparlanyp otyr. Degenmen, barlyq tekserý jáne esepteý jumystary aiaqtalǵannan keiin, bul tsifrlar ózgerýi múmkin. Sonymen birge, Arys qalasynyń shaǵyn jáne orta biznesi úshin «Báiterek» holdingi tarapynan alty ailyq jeńildik kezeńimen 48 aiǵa deiin bir paiyz mólsherleme boiynsha 5 mln teńgege deiin jeńildik nesie beriletin bolady», - dedi ol.
