Túrkistan oblysynyń ákimi Ómirzaq Shókeev Arysty «aqyldy qalaǵa» ainaldyrý baǵytyndaǵy jumystardy kúsheitýge tapsyrma berdi. Aldaǵy ýaqytta qalanyń ishki júiesiniń barlyq derekteri biryńǵai qaýipsiz platformaǵa jinalatyn bolady. Bul týraly Túrkistan oblysy ákimdiginiń baspasóz qyzmeti habarlady.
Qazirgi tańda 17 sektorǵa bólingen qalanyń 3D kartasy jasalǵan. Karta arqyly aldaǵy ýaqytta qaladaǵy qaita qalpyna keltirilgen úiler týraly tolyq aqparat kórsetilip otyrady. 3D kartanyń aqparattyq júiesine qaladaǵy barlyq turǵyndar sany, menshik iesi týraly mańyzdy aqparattar jáne turǵyn úiler jaily málimetter enedi.
Sonymen qatar oblys ákimi qalalyq kadastrda esepke alynbaǵan úilerdi anyqtap, turǵyndar úshin qajetti qujattardy rásimdeýdi tapsyrdy. Sondai-aq qala turǵyndary evakýatsiia kezinde joǵalǵan jeke kýálikterin tegin qalpyna keltire alady.
«3D-kartalar tótenshe jaǵdai kezinde zardap shekkenderge beriletin kómek negizinde jasalyp otyr. Naqtyraq aitqanda, tótenshe jaǵdai kezinde shyǵynǵa ushyraǵan árbir turǵyn úidiń qalpyna keltirilýine bailanysty. Máselen, qiraǵan úilerdi jóndeý, qoqystardy shyǵarý, gýmanitarlyq kómek bólý syndy aqparattar bolady. Sonymen qatar áleýmettik kómekke muqtaj adamdardyń da tizimi osynda jinaqtalady», - deidi Túrkistan oblysynyń aqparattandyrý, memlekettik qyzmetter kórsetý jáne arhivter basqarmasynyń basshysy Elnur Ótebaev.
Turǵyndar internet arqyly onlain rejimde qaladaǵy qaita qalpyna keltirý jumystaryn qadaǵalai alady. Sondai-aq, qandai da bir másele týyndaǵan jaǵdaida úidiń nemese ǵimarattyń mekenjaiynan júiege aqparat qaldyrý múmkindigi qarastyrylǵan.
Aita keteiik, qazirgi tańda oblys ákiminiń tapsyrmasymen qalany tolyqtai tsifrlandyrý, iaǵni «Smart» qalaǵa ainaldyrý jumystary júrgizilip jatyr.
