Batys Qazaqstan oblysynda balalar úiiniń qyzmetkerlerine jalaqy artyq tólenip kelgen. Al Aqmola oblysynda jetim balalardy tamaqtandyrýǵa bólingen qarajat urlanǵan. Bul týraly QR Qarjylyq monitoring agenttiginen málim etti, dep habarlaidy "Ult aqparat".
QR Prezidenti Qasym-Jomart Toqaev balalar quqyǵyn qorǵaýǵa basymdyq berip, jetim balalar men ata-ana qamqorlyǵynan aiyrylǵan balalardyń barlyq quqyǵyn qamtamasyz etý boiynsha memlekettik mindetter múltiksiz oryndalýy kerektigin eskertken bolatyn.
Osy oraida, Memleket basshysynyń tapsyrmalaryn oryndaý maqsatynda QR Qarjylyq monitoring agenttigi Qazaqstan Respýblikasyndaǵy Bala quqyqtary jónindegi ýákil Arýjan Sainmen birlese otyryp, ózara is-qimyl týraly memorandýmǵa qol qoidy jáne «Qamqor» áleýmettik jobasyna bastaý berdi.
Málim etilgendei, joba quqyq buzýshylyqtardy anyqtap qana qoimai, aldyn alý sharalaryn qabyldaý úshin balalar quqyǵyn qorǵaý júiesindegi «osal tustardy» anyqtaýǵa baǵyttalǵan.
«Mysaly, Batys Qazaqstan oblysynda balalar úiiniń qyzmetkerlerine jalaqyny artyq tóleý jáne iemdenip alý faktisi tergelýde.
Pavlodar oblysynda 5 mln teńgeden astam somaǵa biýdjet qarajatyn jymqyrý belgileri anyqtaldy. Olar balalar aýylynyń aýmaǵyn abattandyrý jumystaryna baǵyttalýy tiis edi.
Aqmola oblysynda jetim balalardy tamaqtandyrýǵa arnalǵan aqsha qarajatyn urlaý faktisi oryn aldy.
Búginde táýekeli bar 15 mekeme anyqtaldy jáne 7 qylmystyq is tirkeldi.
Aldyn alý sharalary jalǵasýda», - dep tolyqtyrdy QR QMA Baspasóz qyzmetinen.
