QR Bala quqyqtary jónindegi ýákil Arýjan Sain múgedek balalardyń ómirin jaqsartýǵa baǵyttalǵan jol kartasy sóz júzinde qalmaýy kerektigin málim etti, dep habarlaidy QazAqparat.
«Jyl eshkimge ońai bolǵan joq. Pandemiianyń búkil eldi ábigerge salǵany belgili. Áitse de bul balalardyń densaýlyǵy men quqyǵyn qorǵaý máselesine kóleńkesin túsirmeýi kerek. Búgingi jiynǵa oblys ákimderiniń orynbasarlary men basqarma basshylarynyń qatysyp otyrǵanyn paidalanyp, myna máselege basa nazar aýdarý kerektigin aitqym keledi. Óńirlerdegi komissiialar nazardan tys qaldyryp jatqan ister bar», - dedi Arýjan Sain QR Úkimeti janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komissiianyń otyrysynda.
Onyń aitýynsha basty mindet – balalardyń múgedektigin tómendetý. Arýjan Sain bul jaily ártúrli otyrysta aityp kele jatqanyn tilge tiek etti.
«Óńirlerde tamyzda qol qoiylǵan jol kartasyna kóp kóńil bólindi. Ol 2021 jyly iske asyrylady. Biz, balalardyń ata-analary, úkimettik emes uiymdar atalmysh jol kartasynyń sóz júzinde qalý qaýpine alańdaýshylyq bildiremiz. Múgedek balalardyń ómirin jaqsartýǵa baǵyttalǵan jol kartasy kóbinese balalardyń múgedektiginiń aldyn alýǵa, densaýlyǵynyń myǵymdyǵyn saqtap qalýǵa baǵyttalǵan. Sol sebepti jergilikti jerlerde óte aýqymdy jumystar atqarylýy kerek», - dedi ol.
Arýjan Sain óz sózinde bala qursaqta jatqannan bastap dúniege kelgennen keiin nárestede bolýy múmkin fýnktsionaldyq shekteýler anyqtalýy kerektigin jetkizdi.
«Soqyrlyq boiynsha múgedektikti azaitý úshin sizder (oblys ákimderiniń orynbasarlary men basqarma basshylaryna) oftalmologtardy oqytyp, perinitaldy ortalyqtardyń bári tiisti qurylǵylarmen satyp alýlaryńyz kerek bolatyn. Qazirgi ýaqytta meniń qolymda osy tapsyrmany oryndaǵany týraly eshqandai aqparat joq. Sol sebepti VAK-tardyń bári osy máseleni basa nazarǵa alýdy suraimyn», - dedi ol.
