QR Bala quqyqtary jónindegi ýákil qyzmetine jaqynda ǵana taǵaiyndalǵan Arýjan Sain elimizde balalarǵa jasalǵan zorlyq-zombylyq jaǵdaiyn boldyrmaý jolynda birshama usynys bildirdi, dep habarlaidy QazAqparat tilshisi.
«Balalarǵa jasalǵan zorlyq-zombylyq jáne balalardyń bir-birine zorlyq-zombylyq kórsetýi jaily aita keteiin. Sizdiń jaqynda jariialaityn Joldaýyńyzda (Prezidentke qarata) biz osyǵan deiin joldaǵan ótinishterimiz eskeriler degen úmittemiz. Atap aitqanda, oblystyq deńgeiden tómengi aýqymdaǵy óńirlerde biz balalarǵa jasalǵan zorlyq-zombylyqqa qatysty qylmystyq isterdi qazbalaý qajet degen oidamyz. Ondai isterdiń qujattamalary, protsedýralary men ol isterdiń jabylýyn oblystyq Prokýratýra men IID basshylarynyń sanktsiialary arqyly júrgizilip otyrǵan. Sebebi, ásirese «ishki bailanys» kúsheiip ketken aýyldar men aýdandarda ondai isterdiń buryn jabylyp qalyp otyrǵanyn bilip otyrmyz», - dedi Arýjan Sain elordada ótip jatqan Tamyz konferentsiiasynda.
Onyń aitýynsha, balalarǵa jasalǵan kez kelgen zorlyq-zombylyqqa qatysty jazany kúsheitip qana qoimai, mundai isterge kelgende taraptarǵa tatýlasý múmkindigin bermeý kerek.
«Óitkeni, mundai isterge kelgende otbasylarǵa qoqan-loqy kórsetý nemese aqsha berip qutylý jaǵdailarymen betpe-bet kelip otyrmyz. Aqyry, zardap shekse de jábirlenýshi tarap aryzyn qaitaryp alady. Osylaisha, balalardyń quqyǵy qorǵalmaidy. Álbette, balalarǵa jasalǵan zorly-zombylyq qylmysyna kedergi keltirgenderge jaýapkershilik júktelýi kerek. Áitpese, bul protsesti toqtata almaimyz. Eger naqty túiindi máselelerdi sheshimin taba alar bolsaq, onda naqty nátijege qol jetkize alar edik», - dedi ol.
Eske sala ketsek, elordadaǵy Táýelsizdik saraiynda Memleket basshysy Qasym-Jomart Toqaevtyń qatysýymen Tamyz konferentsiiasy ótip jatyr.
Qazaqstan Prezidentiniń qatysýmen ótip jatqan sharaǵa elimizdiń túkpir-túkpirinen 2 myńnan astam muǵalim kelgen. Pedagogtar konferentsiia barysynda bilimdi jańǵyrtý boiynsha ádistemelik usynystar ázirlep, bilim berý júiesiniń mazmunyn jańǵyrtý aiasynda ony damytýdyń negizgi baǵyttaryn aiqyndaityn bolady. Sonymen qatar muǵalimder bilim sapasyn arttyrý jáne tálim-tárbie basymdyqtary negizinde bilim berý júiesin jańǵyrtýdyń problemaly máseleleri men keleshegin talqylaidy.
Jiyn aiasynda otandyq bilimdi damytýdaǵy eren eńbegi men belsendi qoǵamdyq qyzmeti úshin birqatar pedagog «Qurmet» ordenimen, «Eren eńbegi úshin», «Shapaǵat» medaldarymen, QR Prezidentiniń alǵys hatymen, «Y.Altynsarin» jáne «Bilim berý isiniń qurmetti qyzmetkeri» tósbelgisimen marapattalady.
