QR Balalar quqyǵy jónindegi ýákili Arýjan Sain ata-analardan balalardy mitingke alyp shyqpaýdy surady, dep habarlaidy QazAqparat.
Ortalyq kommýnikatsiialar qyzmetinde tilshilerdiń suraǵyna jaýap bergen Arýjan Sain Balalar quqyǵy jónindegi burynǵy ýákil Sáýle Aitbaevanyń sózine qatysty pikir bildirdi. Aita keterligi, Sáýle Aitbaeva ata-analardyń balalaryn sanktsiialanbaǵan mitingterge alyp shyǵýyna qatysty naqty zańnamalyq shara qabyldaý máselesin kótergen edi.
«Mitingke qatysty aitarym - áýeli basqa elderde mundai másele qalai qaralatynyn zerttep alýym kerek. Eki ótinishim bar: birinshisi ata-analarǵa. Balalardy ondai aktsiialarǵa qatystyrmańyzdar. Ainalyp kelgende balamen «baraholkaǵa» barýdyń ózi qorqynyshty. Sebebi, adam kóp. Al kóshede ne bolaryn bir qudai biledi. Ata-analardan balalardy mitingke alyp shyqpaýdy suraimyn», - dedi Arýjan Sain.
QR Balalar quqyǵy jónindegi ýákili sonymen qatar, politsiia qyzmetkerlerine de ótinishin bildirdi.
«Ekinshi ótinishim - politsiia qyzmetkerlerine. Eger ata-anany balamen birge IIB-ge aparmai-aq, aiyppuldy poshta arqyly jibere alatyn bolsańyzdar, olarǵa tiispei-aq qoiyńyzdar. Eger ata-ana balamen kelip tursa, aitaryn aitsyn. Al eger ary qarai zań buzylsa, bul sharalardy súirelemei-aq júrgize alasyzdar», - dedi ol.
Eske sala ketsek, buǵan deiin jergilikti atqarýshy organdar men aimaq basshylaryna qarjylyq saiasattty qaita qaraý jóninde úndeý tastap, imidjdik sharalardyń bárin qysqartyp, odan únemdelgen qarajatty balalarǵa jumsaýdy suraǵan edi.
