Júkti shamadan tys tiep júretin kólikterge qatysty aiyppul salý tiimsiz sheshim bolyp tur. Bul týraly Májiliste zańnamalyq aktilerge kólik máseleleri boiynsha ózgerister engizý týraly zań jobasyn tanystyrý kezinde QR Indýstriia jáne infraqurylymdyq damý vitse-ministri Berik Kamaliev aitty, dep habarlaidy QazAqparat.
Talqylaý barysynda júkti shamadan tys artyq tiep, joldy buzatyn kólikterdi shekteý máselesi týraly surayq qoiyldy.
Óz kezeginde vitse-ministr Berik Kamaliev avtojoldarda shamadan artyq júkti kóbine qytailyq kólikter tiep alatynyn rastady.
«Qytailyq júk kólikteri 40 tonnaǵa deiin inertti materialdardy tasymaldaýǵa qaýqarly. Olar avtojolǵa óte joǵary júkteme túsiredi. Bizde kóliktik baqylaý inspektorlary bar, artyq júk tiegenderdi toqtatady. Alaida bul júk kóligin tizgindegen júrgizýshiler inspektordy elemei, ary qarai júre beretin jaǵdailar da kezdesip jatyr. Bul kólikter qalanyń ishindegi joldardy da buzyp júrgeni belgili. Sondyqtan aiyppuldar sekildi is-sharalar tiimsiz ekenin kórsetip otyr», - dedi vitse-ministr.
Sonymen qatar ol kóliktik baqylaýdaǵy sybailas jemqorlyq jaǵdailary da bar ekenin aitty.
«Sondyqtan álemdik tájiribe inspektorlardyń bolmaýyn eskerip otyr. Inspektorlar júrgizýshilermen bailanysta bolmaýy kerek» - dedi Berik Kamaliev.
