Qazaqstan boks federatsiiasynyń bapkerlik máseleler jónindegi vitse-prezidenti, memlekettik jattyqtyrýshy Baqtiiar Artaev Olimpiadadan keiin komandanyń qalai ózgeretinin aitty, dep habarlaidy Sputnik Qazaqstan.
"Ulttyq quramadan eshkim ketken joq. Biraq Olimpiadaǵa barǵan qurama 80 paiyzǵa ózgeredi. Óitkeni rezerv bar, ósip kele jatqan jastar bar. Bizde kásipqoi boksta júrgen jigitter de bar. Bárimen kelissózder júrgizildi. Kásipqoi boksta júrgen jigitterdiń bári kelýge daiyn", - dedi Artaev ortalyq kommýnikatsiialar qyzmetinde ótken onlain brifingte.
Onyń aitýynsha, osy sportshylardyń barlyǵy kelse, 70-80 protsentke jańarǵan komanda biyl bokstan álem chempionatyna barady.
"Endigi másele ýaqyt enshisinde, olardyń qaisysy oqý-jattyǵý jiyndaryna birinshi bolyp kelýine bailanysty. Eger barlyǵy keletin bolsa, onda ulttyq quram 70-80 paiyzǵa aýysady. Osy oraida álem birinshiligine basqa qurammen baramyz.
Sondai-aq, biyldan bastap AIBA erejesine sáikes, jigitter 13 salmaq dárejesi boiynsha óner kórsetedi. Al qyzdarymyz 12 salmaq dárejesinde bokstasa alady. Álem birinshiligine naǵyz myqtylardy aparamyz. Sol kezde basqa boksty kóresizder. Alla jazsa, Olimpiadanyń qateligin de sol jerde ózgertemiz", - dep atap ótti Artaev.
Aita keteiik, 2021 jylǵy bokstan Álem chempionaty Serbiiada ótedi. 2019 jylǵy chempionatta Bekzad Nurdáýletov (81 keli) altyn júldege ie bolsa, Qamshybek Qońqabaev (91 keliden joǵary) kúmis medaldi jeńip aldy. Taǵy tórt boksshymyz qolany qanaǵat tutty.
Al Tokio Olimpiadasynda Qamshybek Qońqabaev pen Sáken Bibosynov qana jartylai finalǵa jetken. Ekeýi de qola júldeger atandy.
