Aqmola oblysynyń Arshaly kentinde mektep qazandyǵynyń jarylýy saldarynan zardap shekken úsh adamnyń biri qaza boldy, dep habarlaidy QazAqparat agenttigi.
Aqmola oblystyq Densaýlyq saqtaý basqarmasy baspasóz qyzmetiniń málimetinshe, 55 jastaǵy er adamnyń ómirin saqtap qalý úshin dárigerler baryn saldy. Alaida, túrli deńgeidegi dene kúiigi men jaraqattardan naýqas reanimatsiia sharalary kezinde kóz jumǵan.
«Saǵat 23.00-degi diagnozy: «Qosarlanǵan politravma. Basy, denesi jáne oń jaq qolynyń, aiaǵynyń 2-3A dárejeli termiialyq kúiigi. Tynys alý joldarynyń kúiigi. Sol jaq aiaq tabannyń 3-4-5 súiekteriniń ashyq synyǵy. Sol jaq jilinshiktiń asyq jiliginiń proksimaldy metaepifiziniń ornynan aýytqýsyz jabyq synyǵy. Sol aiaqtyń qysylý sindromy. Bas-súiek miynyń jabyq jaraqaty. Midyń soqqy alýy. Tóbe súieginiń sol jaq bóliginiń jaraqaty. 3-dárejeli travmalyq shok. Jaǵdaiy asa aýyr.
Saǵat 23.25-te júrek soǵysy toqtady. 30 minýt boiǵy reanimatsiia sharalary nátije bermedi. 23.55-te biologiialyq ólim tirkeldi», - dedi vedomstvodan tilshi saýalyna.
Dárigerlerdiń aitýynsha, qazandyqtyń jarylýy saldarynan zardap shekken taǵy eki adamnyń jaǵdaiy baqylaýda.
Budan buryn habarlaǵanymyzdai, Aqmola oblysynyń Arshaly kentinde mekteptiń jylý qazandyǵy jarylyp, úsh adam zardap shekken bolatyn.
Qazirgi kezde, oblys ákiminiń birinshi orynbasary Málǵajdar Tátkeevtiń tóraǵalyǵymen jedel shtab qurylyp, shuǵyl jumystar atqarylyp jatyr.
