Dárigerler Arshaly qalasynda qaitys bolǵan naýqas boiynsha júrgizilgen qyzmettik tergeýdiń qorytyndysyn jariialady. Áieldiń denesi statsionardan shyqqannan keiin orman alqabynan tabyldy. Komissiia qorytyndysy boiynsha Arshaly aýdandyq aýrýhanasynyń meditsina qyzmetkerleri qoldanystaǵy zańnama normalaryn buzǵan joq, dep habarlaidy QazAqparat.
Aqmola oblysy densaýlyq saqtaý basqarmasynyń málimetinshe, 60 jastaǵy naýqas 2021 jyldyń 21 tamyzynda Shortandy aýdandyq aýrýhanasynyń joldamasy boiynsha Arshaly aýdandyq aýrýhanasynyń statsionaryna túsken.
Áieldiń júrek ainý, qusý, bas aýrýy, entigý, jalpy álsizdik, sirek qurǵaq jótel jáne keýdedegi yńǵaisyzdyq týraly shaǵymdary boldy.
Kelesi kúni saǵat 19:41-de jaǵdaidyń teris dinamikasy men aýyrlyǵyn eskere otyryp, konsiliýmnyń sheshimimen ol qarqyndy terapiia palatasyna, al 26 tamyzda jalpy palataǵa aýystyrylǵan.
Vedomstvodan atap ótkendei, 6 qyrkúiek saǵat 13:15 kezinde naýqasqa jazylyp shyqqany aityldy. Áiel balasy kelgende ǵana bólimsheden shyǵatynyn jetkizgen.
Saǵat shamamen 14:15-te naýqas medbikege ulynyń kelgenin jáne úiine shyqqysy keletinin aitady. Ári qarai kezekshi medbike oǵan bólimsheden shyǵýǵa kómektesken.
Tek saǵat 16:00-de naýqastyń artynan bir uly keldi, oǵan olar áieldiń ketip qalǵanyn habarlaidy. Osydan keiin áieldi izdeý sharalary bastaldy.
«Saǵat 17:00-de izdeýge meditsina qyzmetkerleri de qosyldy. Qyzmetkerler taksi júrgizýshilerimen suhbattasyp, jaqyn mańdaǵy barlyq saýda núktelerin, naýqastyń fotosýreti bar dúkenderdi aralap shyqty. Eki kún boiy dárigerler Ulttyq ulan №6505 áskeri bóliminiń áskeri qyzmetshilerimen birge túngi saǵat 01:00-ge deiin izdestirý jumysyn júrgizdi. Biz saiajai ýchaskelerin aralap, jaqyn mańdaǵy barlyq qaraýsyz qalǵan ǵimarattardy aralap, ózen boiymen júrdik. Eki kúnniń ishinde izdeýge 60-tan astam adam jumyldyryldy», - dedi vedomstvodan.
Jedel-izdestirý sharalary barysynda politseiler Arshaly kentinde ornalasqan beinebaqylaý kameralarynyń jazbasyn qarap, Arshaly men Nur-Sultan arasynda tasymaldaityn taksi júrgizýshilerinen jaýap aldy, adam kóp jinalatyn oryndarǵa baǵdarlar japsyrdy, Arshaly aýdany politsiia bóliminiń jeke quramyn baǵdarlady.
Aqbulaq, Ijevskoe aýylynyń, Arshaly stantsiiasynyń aýmaǵyn aralady.
Nátijesinde 9 qyrkúiekte vokzal mańyndaǵy orman alqabynan áieldiń denesi tabyldy.
«Sol kúni shuǵyl túrde Aqmola oblystyq densaýlyq saqtaý basqarmasynyń basshysy, Meditsinalyq jáne farmatsevtikalyq baqylaý komitetiniń aýmaqtyq departamenti, zań qyzmetteri basshysynyń orynbasary bastaǵan komissiia quryldy. 10 qyrkúiekte basqarma basshysy Nariman Syzdyqov Arshaly aýdandyq aýrýhanasynyń infektsiialyq statsionaryn aralap shyqty. Statsionardyń materialdyq-tehnikalyq jaǵdaiy qanaǵattanarlyq. Infektsiialyq statsionardyń birinshi qabatynda beinebaqylaý kameralary bar. Basqarma basshysy sanitarlyq normalardy saqtai otyryp, ujymmen etika jáne deontologiiany qatań saqtaý máselesi boiynsha jumys kezdesýin ótkizdi» delingen habarlamada.
Sonymen qatar, qyzmettik tergeýdi obektivti jáne jan-jaqty júrgizý úshin densaýlyq saqtaý basqarmasy basshysynyń 10 qyrkúiektegi buiryǵymen bas dáriger Albina Aniýhina qyzmetinen ýaqytsha shettetildi.
«Áreketke qabiletti patsientti shyǵarý týraly málimetterdi senim bildirgen adamdarǵa berý máselesi zańdy túrde aiqyndalmaǵan. Tiisinshe, Arshaly aýdandyq aýrýhanasynyń meditsina qyzmetkerleri qoldanystaǵy zańnama normalaryn buzǵan joq», - dep túiindedi vedomstvodan.
Eske sala keteiik, Aqmola oblysynda statsionardan shyqqannan keiin joǵalǵan 60 jastaǵy áieldiń denesi tabyldy. Osyǵan bailanysty Aqmola oblysynyń densaýlyq saqtaý basqarmasy shuǵyl komissiia qurdy.
