Foto: QR Úkimetiniń baspasóz qyzmeti
«ArselorMittal Temirtaýǵa» 1 mln teńge aiyppul salyndy, dep habarlaidy Kazinform.
«Memlekettik energetikalyq qadaǵalaý komiteti 2023-2024 j. kúzgi-qysqy kezeńde energetikalyq kásiporyndardyń jumysqa daiyndyq pasporttaryn berýdi aiaqtady. Tekserý qorytyndysy boiynsha «ArselorMittal Temirtaý» AQ JEO-2-ge daiyndyq pasportyn berýden bas tartyldy jáne kompaniiaǵa 1 mln teńgege aiyppul salyndy», - dedi EM Atomdyq jáne energetikalyq qadaǵalaý men baqylaý komitetiniń Qaraǵandy aýmaqtyq departamentinen.
Jylý ortalyǵyna daiyndyq pasporty №4,5 eki qazandyqta kúrdeli jáne ortasha jóndeý kestesiniń buzylýy sebebinen berilmedi. Sonymen qatar energiia ortalyǵy materialdardy únemdemek bolǵan.
«№1 st. qazandyǵynda keńeitilgen aǵymdaǵy jóndeý jumystarynyń smetasynda tot baspaityn bolattan jasalǵan taza gazdar qorabyn ornatý kózdelgen. Alaida, «ArselorMittal Temirtaý» AQ JEO-2-de «qara» metaldy paidalaný týraly sheshim qabyldaǵan. Sondai-aq smetada «ArselorMittal Temirtaý» AQ JEO-2-de jańa quiyndylar men buraǵyshtardy (emýlgatorlardyń negizgi elementi) ornatý kózdelgenimen, qoldanystaǵy qondyrǵylardy paidalaný týraly sheshim qabyldaǵan. Olar 16 jyldan astam jumys istep turǵan jáne aitarlyqtai aqaýlary bar bólshekterdi qoldanǵan», - dep habarlady EM Atomdyq jáne energetikalyq qadaǵalaý men baqylaý komitetiniń Qaraǵandy aýmaqtyq departamenti.
Sonymen qatar smeta boiynsha №5 qazandyqta 12 kollektordy tolyq aýystyrý qarastyrylǵan. Alaida «ArselorMittal Temirtaý» AQ olardy aýystyrmai, tek tazalaýmen jáne jóndeýmen shektele salǵan. Bul jaǵdaida belsendi kollektorlardyń 150-den 200 mm-ge deiin aitarlyqtai aýytqýlary baiqalǵan.
Sondai-aq №3 st. qazandyǵynan tútin qubyryna deiin gaz qubyryn jylý oqshaýlaý boiynsha, sondai-aq qazandyq tsehynyń shatyryn jóndeý boiynsha jumys aiaqtalmaǵan.
Aldaǵy jylytý maýsymynda №3 týrbogeneratordyń iske qosylmaý qaýpi joǵary. Sebebi ol rezervsiz qalyp otyr. Buǵan «ArselorMittal Temirtaý» AQ tarapynan stator oramasyn aýystyrý úshin jetkizýshimen shart jasasý rásimderiniń uzaqqa sozylyp ketýi sebep boǵan.
Osy kemshilikterdiń barlyǵyn eskere otyryp, kompaniiaǵa aiyppul salý týraly sheshim qabyldandy.
«Ákimshilik quqyq buzýshylyq týraly kodekstiń 301-babynyń negizinde «ArselorMittal Temirtaý» AQ JEO-2 1 mln teńge somasyna aiyppul túrinde ákimshilik jaýapkershilikke tartylatyn bolady. Joǵaryda aitylǵandardy eskere otyryp, sondai-aq shtattan tys jaǵdailardyń týyndaýyna alǵysharttardy boldyrmaý úshin «ArselorMittal Temirtaý» AQ JEO-2 jylytý maýsymynyń ótýi aýmaqtyq departamenttiń erekshe baqylaýyna alynady», - dep tolyqtyrdy vedomstvodan.
