Foto: Tengrinews.kz
Qazaqstan aýmaǵynda qatty paidaly qazba kenishterin igerýshi ERG, «Qazaqmys», «ArselorMittal Temirtaý» siiaqty alpaýyt kompaniialardyń memleketpen jasaǵan investitsiialyq kelisimsharttary jalpyǵa qoljetimdi etip jariialanady, dep habarlaidy Kazinform.
Bul týraly Ónerkásip jáne qurylys vitse-ministri Iran Sharhan Ádilet ministrliginde ótip jatqan vedomstvoaralyq komissiia otyrysy kezinde aitty.
«Qazir qoǵamda burynǵy Qaraǵandy metallýrgiia kombinaty L.Mittaldyń qolyna qalai ótkeni týraly daýly pikir kóp. Sarapshylar osyndai investitsiialyq kelisimsharttar jariia túrde bekitilýi kerektigin aityp júr. Zańnamaǵa osy turǵyda ózgeris engizesizder me?», - dep surady jýrnalist vitse-ministrden.
«Bizde qazir halyqaralyq bastama bar. Sol bastamaǵa biz de qosyldyq. Búkil litsenziialardyń, kelisimsharttardyń sharty bizdiń ministrlik saitynda jariialanady. Kez kelgen adam onymen tanysatyn múmkindik bolady. Osyǵan deiin qol qoiylǵan sharttardyń mátini de jariialanady. Siz aityp otyrǵan «ArselorMittal Temirtaýdyń» da, kez kelgen jer qoinaýyn paidalanýshylardyń kelisimsharttary jariialanady», - dedi ol.
Ministr orynbasarynyń sózinshe, zańnamadaǵy bul ózgeris kúshine engenshe biraz ýaqyt kerek.
«Biz bul jumysty bastap kettik. Litsenziialar saitymyzda jariialandy da. Al investitsiialyq kelisimsharttardyń mátinderimen jumys istep jatyrmyz. Osy jyldyń aiaǵyna deiin kelisimsharttardyń jartysyn jariialap bolamyz. Kelesi jyldyń ortasyna deiin qalǵanynyń bárin tirkep bolamyz. Men munai salasyn aitpai-aq qoiaiyn, tek qana qatty qazbalar boiynsha aityp turmyn. «Qazaqmys, «ERG, «Arselor» siiaqty kásiporyndardyń kelisimsharttarynyń mátini jariialanady», - dedi Iran Sharhan.
