"ArselorMittal Temirtaý" shahterleri jer ústine áli shyqpai otyr, - dep habarlaidy Tengrinews.kz tilshisi.
Munyń aldynda tórt shahtanyń 200 adamy (túngi aýysymdaǵy) joǵary shyqpai otyrǵany habarlanǵan edi. Olardyń ókilderi "ArselorMittal Temirtaý" AQ basshylyǵymen kezdesýge shyqqan. Bul týraly Qaraǵandy oblystyq ákimdiginiń saitynda habarlandy.
"Kenshilerdiń ókilderi "ArselorMittal Temirtaý" AQ kompaniia baslyshyǵymen kezdesý úshin jer betine kóterildi. Kezdesý "Qorǵaý" kómir kenshiler kásipodaǵynyń jáne oblys ákimdigi basshylyǵynyń qatysýymen ótti. Kelissóz jalǵasýda. Osyǵan deiin 11 jeltoqsan 19.30-dan 21.30-ǵa deiin Shahtinskide kenshilerdiń otbasy músheleri oblys ákiminiń orynbasary jáne "ArselorMittal Temirtaý" AQ ókilderimen kezdesken bolatyn. Kenshilerdiń týǵan-týystaryna qalyptasqan jaǵdai týraly, sonymen qatar, qoiylǵan barlyq saýal boiynsha túsinikteme berildi", - delingen saittaǵy habarlamada.
11 jeltoqsanda Shahtinsk turǵyndary WhatsApp arqyly qalanyń ortalyq alańynda miting bolatyny jaily habar alǵan. 19.00-de Shahtinsktiń Mádeniet saraiynyń aldyna adamdar jinala bastaǵan. Olardyń ishinde jumysshylardyń áielderi men otbasy músheleri bolǵan.
Shahtinsk ákimdiginiń ókilderi, oblys ákiminiń áleýmettik máseleler jónindegi orynbasary Jandos Ábishev, oblys ákiminiń energetika, TKSh jáne TJ máseleleri jónindegi orynbasary Anatolii Shkarýpa, oblys prokýrorynyń orynbasary Meiram Táýtenov jinalǵandardyń aldyna shyqty. Jandos Ábishev jumysshylardyń jalaqysyn kóterý boiynsha másele "Qorǵaý" kásipodaǵy jáne "AMT" AQ ókilderimen birge sheshilgenin málimdedi.
Ujymdyq kelisimshart boiynsha barlyq qujatqa qol qoiylyp, jalaqyny 2018 jyldyń 1 qańtarynan kóterý josparlanyp otyrǵany aityldy. Jinalǵandardyń birazy aiazǵa qaramastan, kishkentai balalaryn alyp kelip, Shahtinsktiń mádeniet úiine kirýden bas tartqan.
Jumysshylardyń áielderi men týystary jer astynda narazylyq tanytyp jatqandarmen niettestigin bildiretinin aitqan. Birshama ýaqyttan keiin olar mádeniet úiine kirdi.
"Qazirgi ýaqytta shahtalarda kelissóz júrip jatyr, barlyq tórt shahtaǵa bastamashyl toptar, jergilikti atqarý organdary, eńbek inspektsiiasy jáne "AMT" AQ ókilderi tústi. Shahterler árbir shahtadan úsh ókilden sailap, kelissózge jibergen. Jalaqy boiynsha másele talqylanyp jatyr. Ortasha eseppen jalaqy 5-ten 30 paiyzǵa deiin ósedi", - dep málimdedi Ábishev.
Eske salaiyq, 11 jeltoqsanda "ArselorMittal Temirtaý" shahterleri aýysymnan keiin joǵary qarai shyqpai qoiǵan. Narazylyq tanytyp jatqandardyń týystary áleýmettik jelilerde jariialap jatqan málimetter boiynsha, shahterler jalaqyny ósirýdi jáne eńbek jaǵdaiyn jaqsartýdy talap etip jatyr eken.
