Sáýir aiynda «ArselorMittal Temirtaý» AQ óndiristi jańǵyrtý men qaita qurýdyń strategiialyq damý josparyn usynady, dep habarlaidy "Ult aqparat" Ekologiia ministrligine silteme jasap.
Buǵan deiin Qazaqstannyń ekologiia, geologiia jáne tabiǵi resýrstar ministri Maǵzum Myrzaǵaliev «ArselorMittal» kompaniiasynyń vitse-prezidenti Vijai Goial myrzamen kezdesken edi.
«2019 jyldyń sońynda kompaniiamen memorandým bekittik. Kompaniia 4 jyl ishinde shyǵaryndylardyń 30%-yn azaitý týraly mindetteme aldy. 2020 jyldyń qorytyndysy boiynsha ministr bastaǵan top Temirtaýda úsh ret keńes ótkizdi. Qańtar aiynda da baryp keldi, biraq kompaniia bul mindettemelerdi oryndamai jatyr. Memorandým boiynsha talaptardyń nege oryndalmai jatqany týraly óte qatań áńgime boldy», - dedi QR EGTRM Ekologiialyq retteý jáne baqylaý komitetiniń tóraǵasy Zýlfýhar Joldasov Nur-Sultanda ótken jýrnalisterge arnalǵan brifingte.
Onyń aitýynsha, kompaniia qazirgi pandemiiaǵa, karantin sharalaryna jáne jabdyqtardy jetkizýdiń qiyndyǵyna jáne basqa da sebepterdi aitqan.
«Kompaniia sáýir aiynyń sońyna deiin shyǵaryndylardy jańǵyrtý, qaita jaraqtandyrý jáne azaitý boiynsha tolyq strategiiany usynýǵa ýáde berdi. Ministr barlyq talaptardy aitty: 4 jyl ishinde shyǵaryndylardy kem degende 30% tómendetýdi qamtamasyz etý, halyq pen memlekettik organdar shyǵaryndylardyń naqty kólemin kóre alýy úshin barlyq shyǵaryndylardy avtomattandyrý qajet», - dep atap ótti Z. Joldasov.
Sonymen birge Z. Joldasov ýáde men strategiialar oryndalmasa, kompaniiaǵa qaýip tónetinin aitty.
«Eger oryndalmasa, ruqsatty qaitaryp alý máselesi de qarastyrylýy múmkin. Ruqsatty keri qaitaryp alý árine, jabýdy, toqtata turýdy qamtidy. Iaǵni, bul mindettemelerdi qatań qoiyp, olardyń oryndalýyn qadaǵalaityn bolamyz», - dedi komitet tóraǵasy.
Sondai-aq, Temirtaý qalasynda úsh jyl ishinde 500 myń aǵash otyrǵyzý jospary bar
