Foto: Tengrinews.kz
Ónerkásip jáne qurylys ministri Qanat Sharlapaev «ArselorMittal Temirtaý» kompaniiasynyń ataýyn aýystyrý jóninde pikirin bildirdi, dep habarlaidy Kazinform agenttigi.
«Kompaniianyń rebrendingin jańa investor naqty bekitedi. Bizdiń pikirimizshe, burynǵy tarihi „Qarmet“ ataýyn qaitarý qajet. Muny qyzmetkerler men turǵyndar da qoldaidy dep oilaimyn», — dedi Sharlapaev Úkimette ótken brifingte.
Aita keteiik, «ArselorMittal Temirtaý» AQ memleket menshigine qaitarý kelissózderi aiaqtaldy. AMT eki kásipornynyń quny 286 mln dollarǵa baǵalanǵan.
Jańa investor — qazaqstandyq biznesmen Andrei Lavrentev. Ol 1979 jyly Almaty qalasynda dúniege kelgen. «Allur Group» kompaniialar tobynyń direktorlar keńesiniń tóraǵasy, onyń quramynda «Agromashholding» jáne «SaryarqaAvtoProm» JShS bar.
Sondai-aq, «ArselorMittal Temirtaý» «Qazaqstan halqyna» qoryna 16 mlrd teńge qaiyrymdylyq qarjy aýdarady. Bul qarajattyń 50 paiyzy Temirtaý qalasyna jáne qalǵany Qaraǵandy oblysyn damytýǵa jumsalady.
