"ArselorMittal Temirtaý" AQ bas direktory Paramjit Kalon kenshilerdiń ereýiline bailanysty biylǵy óndiristik jospardyń oryndalmaitynyn málimdedi, - dep habarlaidy kaz.tengrinews.kz RIA Novosti-ǵa silteme jasap.
"Biyl bizdiń mindet - 4,2 million tonna berik bolat pen 10,5 million tonnadan asa qatardaǵy kómir óndirý bolǵan, osy maqsatqa senimmen jyljyp kele jatqan edik. Alaida osy bolǵan jaǵdailarǵa bailanysty maqsatymyzǵa jete almaimyz", - dedi Kalon kompaniia qyzmetkerlerine aitqan úndeýinde.
Kásiporyn basshysy 2016 jyly kompaniianyń 4 million tonnaǵa jýyq berik bolat óndirgenin, munyń 2007 jyldan beri eń joǵary kórsetkish ekenin atap ótti.
"Kompaniiamyzǵa investitsiia bólý týraly basshylyqpen kelissóz osy jaǵdailarǵa bailanysty óte kúrdeli boldy, biraq ekonomikalyq jaǵdaidyń qiyndyǵyna qaramastan, ony kóndire aldym, endi ármen qarai da múmkindigimiz jetken jerge deiin jumys isteýge daiynbyz, sebebi kompaniia qarjylai tabys kórip, jumysshylardy da, olardyń otbasyn da, kompaniiany da bai-qýatty etýimiz qajet", - dep atap ótti Kalon.
Onyń málimetinshe, ótken kúzde aldaǵy bes jylǵa investitsiialyq jospar bekitilgen.
"Bolǵan jaǵdaiǵa qaramastan, osy jospar boiynsha 2018 jyly kompaniianyń damýyna 450 million dollar bólinedi (150 milliard teńge). Onyń 340 million dollary zamanaýi tehnologiialardyń damýyna kapital jumsalymy (onyń shamamen 40 milliard teńgesi kómir departamentine arnalǵan) bolsa, al 110 million dollar operatsiialyq ózin-ózi óteýshilikke bólinedi", - dedi kásiporyn basshysy.
Al óz kezeginde QR investitsiialar jáne damý ministri Jeńis Qasymbek "ArselorMittal Temirtaý" kenshileriniń jyl sońyna deiin metall óndirý boiynsha joba kólemin oryndap shyǵýǵa mindetti ekenin málimdedi.
Májilis otyrysynan tys ýaqytta ministrge Qaraǵandy oblysyndaǵy kenshilerdiń ereýili "ArselorMittal Temirtaý" AQ jumysyna qalai áser etkeni jaily suraq qoiyldy. "Ereýilder "ArselorMittal Temirtaýdyń" óndiristik kórsetkishine esh áser etken joq. Bizdiń oiymyzsha, kompaniiadaǵylar jyl sońyna deiin kómir tabý men metall óndirý boiynsha jobany aiaqtaý tiis. Kompaniia basshylyǵy osyndai málimdeme jasady", - dedi ministr Qasymbek.
11 jeltoqsanda "ArselorMittal Temirtaý" shahterleri aýysymnan keiin joǵary qarai shyqpai qoiǵan bolatyn. Narazylyq tanytyp jatqandardyń týystary áleýmettik jelilerde jariialap jatqan málimetter boiynsha, shahterler jalaqyny ósirýdi jáne eńbek jaǵdaiyn jaqsartýdy talap etken.
Al 15 jeltoqsanda Qaraǵandy oblysynda ereýildegen barlyq kenshiniń shahtalardan shyqqany habarlanǵan bolatyn.
Sondai-aq, keiinirek ereýildegen kenshiler men "ArsellorMittal Temirtaý" basshylyǵynyń qandai kelisimge kelgeni aitylǵan edi.
