"ArselorMitall Temirtaý" shahtasynda birneshe kenshi jaǵdaiy nasharlap, jer betine shyqty, - dep habarlaidy Tengrinews.kz tilshisi.
"Qorǵaý" kómir óndirýshiler kásipodaǵynyń tóraǵasy Marat Mirgoiazovtiń aitýynsha, keibir shahterler álsirep, meditsinalyq kómekke júginip jatyr. Aitýlarynsha, onda meditsinalyq pýnkter táýlik boiy jumys istep jatyr. "Arasynda álsiregender boldy. Naqty qansha adam ekenin aita almaimyn, ár shahtada ár túrli sandar. Bireýler joǵaryǵa qarai kóterilip, meditsinalyq kómekke júginip jatyr. Árine, olar osymen birneshe kún jer betine shyqpai otyr", - dedi "Qorǵaý" kómir óndirýshiler kásipodaǵynyń tóraǵasy Marat Mirgoiazov.
Condai-aq, onyń aitýynsha, "ArselorMitall Temirtaý" kompaniiasy basshylyǵymen júrgizilip jatqan kelissózder ázirshe shahterler úshin jaqsy nátije bergen joq. "Kelissózder jalǵasyp jatyr. Áli ortaq mámilege kelgen joqpyz. Qazirgi ýaqytta qoiylǵan talaptardyń birinshisin - jalaqyny ósirý týraly máseleni qarastyryp jatyrmyz. Qalǵan pýnktiler onsyz da sheshiledi. Keibir máseleler úkimettegilerge joldandy. Qazir kompaniia shahterlerdiń jalaqysyn 30 paiyzǵa ósirýdi usynyp otyr", - dedi Marat Mirgoiazov.
Sondai-aq, áleýmettik jelilerde Shahtada tutqyndaýlar bolyp jatqany jaily habarlamalar tarap jatyr. Qaraǵandy oblystyq IID baspasóz qyzmetiniń málimetinshe, Shahtada eshqandai tutqyndaýlar men qamaýlar bolǵan joq.
Sondai-aq, ákimdiktegiler oblys ákimi Erlan Qoshanovtyń jeke-jeke "Shahta", "Tentek", "Lenin" jáne "Qazaqstan" shahtalaryna túskenin aityp ótti. Olardyń málimetinshe, uzaqqa sozylǵan kelissózderdiń nátijesi boiynsha 150-den asa shahter jer betine shyqty.
"12 jeltoqsanda saǵat 14.00-de Qaraǵandyǵa oblys ákimi Erlan Qoshanovpen kezdesý úshin "ArselorMittal TMD" bas direktory Paramjit Kalon keldi. Kompaniialar qoiǵan talaptar talqylanyp, kezdesý saǵat 23.00-de aiaqtaldy. Kezdesýden keiin oblys ákimi "ArselorMittal Temirtaý" AQ atqarýshy direktory Vadim Basinmen jer astynda otyrǵan shahterlerge bardy", - dep habarlady Qaraǵandy oblysy ákiminiń baspasóz qyzmeti.
Saǵat 00.30-da Erlan Qoshanov "Shahta" kenshilerine qarai tústi. Eki saǵat boiy júrgizilgen kelissózderden keiin 59 adam kóterildi.
Al "Tentek" shahtasynda osyndai kelissózdderden keiin 76 adam joǵaryǵa kóterildi. Al tańǵy saǵat 3-te oblys ákimi "Tentek" shahtasyndaǵy kenshilermen, "ArselorMittal Temirtaý" AQ direktorlarymen jáne brigadirlermen jinalys ótkizdi.
"Shahterlerdiń talaptary men kompaniianyń usynystary talqylandy. Saǵat 04.00-de ákim "Lenin" shahtasyna keldi. Shahterlermen sóilesken soń 19 adam kóterildi, Saǵat 6-da ákim Qazaqstan shahtasyna bardy. Kelissózder áli júrgizilip jatyr", - dedi ákimniń baspasóz qyzmetindegiler.
13 jeltoqsandaǵy tańǵy saǵat 8-degi jaǵdai boiynsha jer astynan 154 shahter kóterildi.
Aita keteiik, osyǵan deiin 600-dei shahterdiń jer astynda qalyp otyrǵany habarlanǵan bolatyn.
Qazaqstan Respýblikasynyń Kásipodaqtar federatsiiasy tóraǵasynyń orynbasary Muhtar Tinikeev "ArselorMittal Temirtaý" shahterleriniń ereýiline qatysty pikir bildirgen edi. "Sol jaqqa oqiǵa ornyna baryp, jaǵdaidy qaraimyn. Sonda túsinikti bolady. Syrttarynan baqylyp júremin, kerek bolyp jatsa sóilesemin. Meniń oiymsha, negizi onda bas direktor Kalon nemese Mittal myrzanyń ózi júrýi kerek", - degen edi Tinikeev.
Eske salaiyq, 11 jeltoqsanda "ArselorMittal Temirtaý" shahterleri aýysymnan keiin joǵary qarai shyqpai qoiǵan. Narazylyq tanytyp jatqandardyń týystary áleýmettik jelilerde jariialap jatqan málimetter boiynsha, shahterler jalaqyny ósirýdi jáne eńbek jaǵdaiyn jaqsartýdy talap etip jatyr.
