Foto: Tengrinews.kz
Depýtattar "Arselor Mittal Temirtaý" AQ basshylyǵyn qylmystyq jaýapqa tartýdy talap etti, - dep habarlaidy Massaget.kz portaly.
Májilis depýtattary Erlan Sairov pen Qudaibergen Beksultanov "Arselor Mittal Temirtaý" AQ Kómir departamentiniń "Qazaqstan" shahtasyndaǵy apatqa qatysty birlesken málimdeme jasady.
Olardyń aitýynsha, kómir shahtalaryndaǵy jabdyqtardyń jai-kúii, sondai-aq óndiriste eńbek etetin jumysshylardyń bei-bereket qysqartylýy osyndai qaiǵyly oqiǵanyń oryn alýyna sebep boldy.
"Buǵan deiin Amanat partiiasynyń depýtattary qarajat únemdep, otandastarymyzdyń ólimine ákep soqtyrarlyq sheshim qabyldaityn kompaniianyń top-menedjmentin – sheteldik azamattaryn qylmystyq jaýapqa tartýdy talap etken edi. Birneshe eskertýge qaramastan, transulttyq kompaniianyń basshysy, Mittal myrza otandastarymyz apatqa ushyramaýy, jaraqattanbaýy jáne qaza tappaýy úshin tiisti shara qabyldaýǵa múldem tyryspady. Biz bul sózimizdi Úkimetke qarata aityp otyrmyz: esep aiyrysatyn kez keldi – Mittal myrzamen jolymyz bir emes! Onymen qoshtasatyn ýaqyt keldi!", - delinedi málimdemede.
Depýtattar Bas prokýrorǵa júginip, "Arselor Mittal Temirtaý" AQ basshylyǵyn jaýapqa tartýdy talap etti.
"Mittal úshin otandastarymyz jai ǵana shyǵyn materialy ispetti. Qynjylmai qutyla salady. Bizge mundai investordyń keregi joq", - dedi depýtat Snejanna Imasheva.
Al májilismen Nikita Shatalov Lakshmi Mittal keiingi jyldary oryn alǵan barlyq qaiǵyly oqiǵadan qorytyndy shyǵarmaǵanyn, al kompaniia menedjmenti úshin otandastarymyzdyń qazaǵa ushyrap jatqany jáne olardyń densaýlyǵyna udaiy qaýip tónip turǵany mańyzdy másele emes ekenin atap ótti.
"Biz kómir óndirý jáne baiytý, bolat balqytý tehnologiiasyn damytýdyń ondaǵan jylyn joǵalttyq. Ol az bolǵandai, osy nysandarda otandastarymyzdan aiyrylyp qalyp jatyrmyz. Budan arylýdyń bir ǵana joly bar – memleket Mittaldyń kompaniiasyn elden shyǵaryp, Qazaqstannyń jer qoinaýy men otandyq ónerkásipti paidalanýy týraly onymen jasalǵan barlyq kelisimdi buzýy kerek. Budan bylai mundai soraqylyqqa nege tóze berýimiz kerek ekenin túsinbeimin. "Arselor" otandastarymyzdyń ólimimen baiyp otyr", - dedi depýtat.
