FOTO: JEMAL COUNTESS / POOLJEMAL COUNTESS | EPA
AQSh bas prokýrory Merrik Garlend Baidenniń qupiia qujattardy saqtaý sebebin tekseretin arnaiy prokýrordy taǵaiyndady. Prokýror "qupiia" dep belgilengen qujattar prezident Djo Baidenniń úii men zertteý qorynyń ǵimaratynda qalai paida boldy degen suraqqa jaýap izdeidi, dep habarlaidy Azattyq.
Bas prokýrordyń jarlyǵynda arnaiy prokýrordyń mindeti Djo Baidenniń qupiia qujattardy basqa jaqqa "zańsyz" kóshirýi men saqtaýyn tergeý dep jazylǵan. Másele Barak Obama ákimshiligi kezinde vitse-prezident bolyp turǵan shaqta Baidenniń qolynan ótken qujattarda bolyp otyr. Olar ózge qujattarmen birge vitse-prezidenttiń rezidentsiiasynan tasymaldanǵan siiaqty jáne olardy byltyr qarashada Baidenniń kómekshileri tapqan.
Oqiǵadan habary bar adamdardyń sózine qaraǵanda, onnan astam qujattyń "qupiia" belgisi bar. Qaǵazdar ulttyq arhivke berilgen. Birneshe aptadan soń Baidenniń advokattary Baidenniń Ýilmingtondaǵy úiinen taǵy birneshe qupiia qujat tapqan.
Aq úi aqparatty 10 qańtarǵa deiin habarlamaǵan. 12 qańtarda Aq úi baspasóz hatshysy ákimshilik tergeýge kómektesetinin, qupiia qujattar ulttyq arhivke qatelesip ýaqytynda berilmegenin aitty.
Zańǵa sáikes, Aq úiden ketkennen keiin prezident pen vitse-prezident qyzmettik qujatnamalaryn ulttyq arhivke tapsyrýy tiis. Mundai talapty oryndamaý qylmystyq jaýapkershilikpen qýdalanady.
Byltyr burynǵy prezident Donald Tramptyń Floridadaǵy rezidentsiiasynan júzdegen qyzmettik, arasynda qupiialary da bar, qujat tabylǵan soń bastapqyda FBR, keiin arnaiy prokýror tergeý bastaǵan. Mamandar burynǵy prezidenttiń ústinen qylmystyq is qozǵalýy múmkin ekenin de aitqan. Prezident Baiden sol kezde ózine deiin prezident bolǵan Tramptyń "asqan jaýapsyzdyǵyna" bas shaiqaǵan.
Endi Baidenniń ózi bas prokýrordyń nysanasyna ainalyp otyr, bul - prezident úshin asa jaǵymsyz jańalyq. Respýblikashyldar Baidenge qatysty birqatar tergeý júrgizetinin málimdedi. Olar aqparat nelikten birneshe ai boiy jariialanbady degen saýal qoiady.
Copyright (c) 2013. RFE/RL, Inc. Reprinted with the permission of Radio Free Europe/Radio Liberty, 1201 Connecticut Ave., N.W. Washington DC 20036.
