Arnaiy oryn belgileý beibit jiyn ótkizý mádenietin arttyrýǵa múmkindik beredi. Bul týraly búgin QR Aqparat jáne qoǵamdyq damý vitse-ministri Daniiar Esin aitty, dep habarlaidy QazAqparat.
«Zańnamamen beibit jiyn ótkizý úshin eskertý tártibin engizý josparlanyp otyr», - dedi ol «Qazaqstan Respýblikasynda beibit jiyndar, sherý, piketter, demonstratsiialyq jinalystardy ótkizý men uiymdastyrý tártibi týraly» zań jobasyn qoǵamdyq tyńdaý barysynda.
Onyń atap ótýinshe, beibit jiyn ótkizýge jergilikti atqarýshy organdar tarapynan jaýap bolmaǵan jaǵdaida ol kelisilgen dep sanalady.
«Sonymen qatar zań jobasynda beibit jiyn ótkizý úshin balama oryn usyný quqyǵy kózdeledi. Jiyn ótkizýge ruqsat berýden bas tartýdyń birqatar sebebi orynnyń bos bolmaýyna bailanysty ekenin tájiribe kórsetip otyr. Biz zańnamalyq turǵyda balama orynnyń bolýyn qarastyramyz. Beibit jiyndar shetki aimaqtan emes, mamandandyrylǵan oryndarda, sonymen qatar máslihat quziretimen bekitilgen oryndarda ótkiziledi. Oryndy usyný barysynda onyń qalanyń shetki aimaǵynda bolmaýy printsipi saqtalýy tiis», - dedi Daniiar Esin.
Vitse-ministrdiń aitýynsha, mundai oryndardy aiqyndaý barysynda infraqurylym da qaperge alynýy tiis.
«Bul oryndardy aiqyndaý jáne olardy paidalaný tártibin bekitý barysynda beibit jiyn maqsatyna qol jetkizý múmkinshiligi, uiymdastyrý qolailyǵy, kólik qoljetimdiligi, uiymdastyrýshylar men qatysýshylardyń infraqurylymdy paidalana alýy, sanitarlyq normalar men qaýipsizdik erejeleriniń saqtalýy qamtamasyz etilýi tiis. Zańnamamen mundai mamandandyrylǵan oryndar eldi mekenniń ortalyq bóliginde anyqtalatyny kózdelgen. Biz mamandandyrylǵan oryndardy engizý beibit jiyndar ótkizý mádenietin arttyrýǵa, septigin tigizip, oi-pikirdi erkin aitý úshin mamandandyrylǵan oryndardyń qoljetimdiligin qamtamasyz etedi dep sanaimyz. Óitkeni, mundai oryndar beibit jiyn ótkizýge, uiymdastyrýshylar men qatysýshylardyń qaýipsizdigin qamtamasyz etýge arnalady», - dedi vitse-ministr.
Aita keteiik, zań jobasyn qoǵamdyq talqylaýǵa memlekettik organdar, úkimettik emes uiymdardyń ókilderi, kórnekti qoǵam qairatkerleri men zańger ǵalymdar qatysty.
