Shyǵys Qazaqstan oblysynda uiymdasqan qylmystyq toptyń joly kesilip, 167 mln teńgeniń esirtkisi tárkilendi, dep habarlaidy "Ult aqparat".
ShQO Politsiia departamenti baspasóz qyzmetiniń málimetine súiensek, tártip saqshylary óńirde jáne Almaty oblysynda áreket etken qylmystyq topty áshkereleý úshin arnaiy keń aýqymdy operatsiia ótkizdi.
«Nátijesinde, bir aiǵa jýyq ýaqyt ishinde atalǵan toptyń músheleri túgel belgili boldy. Olardyń barlyǵy basqa qalalardan kelgen. Kúdiktiler qaýipsizdik maqsatynda jaldamaly páterlerdi únemi aýystyryp otyrdy. Sondai-aq ózi Almaty oblysynda júrip, qylmystyq toptyń barlyq is-áreketterine jetekshilik etip otyrǵan er adam anyqtaldy», - dep habarlady vedomstvo ókilderi.
Esirtki saýdasymen ainalysatyn ár adamnyń óz róli bolǵan. Belgili bir top esirtkini jetkizse, endi bireýleri ony doza boiynsha ólshep, keiinnen shahardaǵy arnaiy oryndarǵa qoiyp ketip otyrdy. Tintý barysynda satýǵa daiyndalǵan 10 keli sintetikalyq esirtki tárkilendi. Bul shamamen birrettik 100 000 dozaǵa teń.
«Tasmaldaýshylarǵa esirtki taýar kólik-logistikalyq kompaniialary arqyly qosalqy bólshekter túrinde jóneltilgen. Esirtkisi jasyrylǵan barlyq avtobólshekterdi qyzmettik itter taba almas úshin syrtyn lakpen boiaǵan», - dedi ShQO PD bastyǵy Saǵat Mádiev.
Eshkim kórmes úshin esirtki túngi ýaqytta arnaiy jerlerge qoiylyp otyrdy. Sáýir aiynyń basynda kúdiktilerdi ustaý úshin tiisti sharalar bastaldy. Bir apta ishinde qala aýmaǵynda áreket etken barlyq esirtki tasymaldaýshylar qamaýǵa alyndy. Óz úilerin jalǵa bergen páter ieleri jaldaýshylardyń úidi esirtkini ólshep-daiyndaý tsehyna ainaldyrǵandaryn kórgende jaǵalaryn ustaǵan.
«Almaty oblysy Talǵar aýdany Qyzylqairat aýylyndaǵy jaldamaly úide sintetikalyq esirtkini daiyndap, ólshep-oraityn esirtki zerthanasyn uiymdastyrýǵa tutastai bir otbasynyń qatysy bar ekendigi belgili boldy. Kúdiktiler Telegram messendjeri arqyly esirtkini bailanyssyz taratýmen ainalysty. Al klientterden tólemdi elektrondy tólem júieleriniń kómegimen qabyldaǵan. Aýqymdy arnaiy operatsiia nátijesinde 21-49 jas aralyǵyndaǵy 7 adam qamaýǵa alyndy. Tárkilengen zattardyń «qara naryqtaǵy» quny – 167 mln teńge. Kúdiktilerge qatysty QR QK-niń 297-baby boiynsha tergeý amaldary júrgizilip jatyr. Olar 15 jylǵa deiin bas bostandyqtarynan aiyrylýlary múmkin», - delingen aqparatta.
