Qorǵanys ministrliginde Dariǵa Nazarbaevanyń tóraǵalyq etýimen Parlament Senaty Halyqaralyq qatynastar, qorǵanys jáne qaýipsizdik komitetiniń kóshpeli otyrysy ótti, dep habarlaidy "Ult aqparat" palatanyń baspasóz qyzmetine silteme jasap.
Kóshpeli otyrys barysynda Áskeri doktrinany, sondai-aq QR Qarýly Kúshteriniń, ózge áskerler men áskeri qurylymdardyń qurylysy men olardy damytý tujyrymdamasyn júzege asyrý máseleleri talqylandy.
Sharaǵa Senat depýtattary, Qorǵanys ministrliginiń, Ulttyq qaýipsizdik komiteti Shekara qyzmetiniń, IIM Ulttyq ulanynyń basshylyǵy qatysty.
D.Nazarbaeva eldiń qorǵanys qabiletin jáne qaýipsizdigin qamtamasyz etý máseleleriniń mańyzdylyǵyn atap ótti.
«Qarýly kúshter elimiz halqy táýelsizdiginiń kepili bolyp tabylady», - dedi senator syrtqy qaýipterdiń aldyn alý jáne joiýda armiianyń artyp otyrǵan rólin aita kele.
Otyrysta Qarýly Kúshteri Bas shtaby bastyǵynyń birinshi orynbasary general-maior Rýslan Shpekbaevtyń Áskeri doktrinaǵa qatysty baiandamasy tyńdaldy. Ol doktrinaǵa alǵash ret - kúrestiń «gibridti» ádisteri, «áskeri emes quraldar», «ishki qarýly qaqtyǵys» uǵymdary men anyqtamalary engizilgenin jetkizdi. Sonymen qatar qujatta QR Qarýly Kúshterin, ózge áskerler men áskeri quralymdardy qoldanýdyń tártibi naqtylanǵan. Budan ózge kiber qaýipsizdik sharalaryn kúsheitý, jalpy áskeri qaýipsizdikti qamtamasyz etý júiesine aýmaqtyq qorǵanysty integratsiialaý, materialdyq-tehnikalyq qamtamasyz etý júiesin damytý, Qazaqstannyń beibitshilikti qoldaý sharalaryna qatysýyn keńeitý, memlekettiń áskeri uiymdardy basqarý júiesin damytý tártibi naqty kórsetilgen.
«Bizdiń birlesken jan-jaqty jumysymyz armiiany qajetti, zamanaýi qarý-jaraqpen jáne áskeri tehnikamen jaqyn arada jabdyqtaý máselelerin sheshýge múmkindik beredi. Ol úshin Qorǵanys týraly zańǵa tiisti túzetýler engizý qajet jáne bul múddeli memlekettik organdarmen jumys jasaýdy talap etedi», - dep atap ótti Halyqaralyq qatynastar, qorǵanys jáne qaýipsizdik komitetiniń tóraǵasy Dariǵa Nazarbaeva.
