2020 jylǵy 1 aqpanǵa deiin Armeniiadan kólik ákelgen jáne Qazaqstan Respýblikasynda esepke qoiǵan qazaqstandyqtar Qazaqstan Respýblikasynyń zańnamasyna sáikes kólik salyǵyn tóleidi, dep habarlaidy "Ult aqparat" QR Qarjy ministrliginiń baspasóz qyzmetine silteme jasap.
2006 jylǵy 6 qarashadaǵy Tabys pen múlikke salynatyn salyqqa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly konventsiianyń erejelerine sáikes Qazaqstan jáne Armeniia qarjy ministrlikteri qosarlanǵan salyq salýdy boldyrmaý maqsatynda kólik quraldaryna salyq salý boiynsha ózara ýaǵdalasty.
«Bizdiń azamattarymyz Qazaqstan Respýblikasynyń aýmaǵyna ákelgen avtomobilder búgingi kúnge deiin Armeniia Respýblikasynyń ýákiletti organdarynda tirkeý esebinen shyǵarylmaǵandyqtan, eki memleket te osyndai kólik quraldaryna salyq salýǵa úmitker bola alady.
Osylaisha, kelissózder nátijesinde Armeniia Respýblikasynan 2020 jylǵy 1 aqpanǵa deiin ákelingen, menshik quqyǵy boiynsha Qazaqstan Respýblikasynyń rezidentterine tiesili avtomobilderge Konventsiianyń 21-baby 4-tarmaǵynyń erejelerine sáikes Qazaqstan Respýblikasynyń ishki ister organdarynda tirkeý esebine qoiylǵan sátten bastap ulttyq zańnamaǵa sáikes Qazaqstan Respýblikasynda ǵana salyq salynýǵa jatady degen ýaǵdalastyqqa qol jetkizildi. Osy maqsattar úshin eki memlekettiń salyq organdary Qazaqstan Respýblikasynda tirkelgen kúnin kórsete otyryp, tirkelgen kólik quraldary boiynsha málimetter almasýdy júrgizetin bolady. Mundai kólik quraldaryna qatysty qosarlanǵan salyq salý týyndamaidy», - dep atap ótti QR QM.
Qazaqstan Respýblikasy Salyq kodeksiniń normalaryna sáikes kólik salyǵyn tóleý mindeti kólik quralyn Qazaqstan Respýblikasynyń memlekettik organdarynda esepke qoiǵan kezden bastap týyndaidy.
Mysaly, eger kólik quraly 2020 jylǵy 1 qarashada tirkeý esebine qoiylsa, 2021 jylǵy 1 sáýirden keshiktirmei 2020 jylǵy qarasha men jeltoqsan úshin biýdjetke kólik salyǵyn tóleý qajet.
Olai bolmaǵan jaǵdaida árbir merzimi ótken kún úshin ósimpul esepteý júzege asyrylady.
