Armeniiada sońǵy eki táýlikte koronavirýsty juqtyrǵandar sany kúrt artyp, 64-ke jetti, dep habarlaidy QazAqparat.
Premer-ministr Nikol Pashiniannyń aitýyna qaraǵanda, naýqastar sanynyń artýy virýsty juqtyrǵandarmen bailanysta bolǵan jáne birge oqshaýlanyp jatqan adamdardy testten ótkizýmen bailanysty.
Osy kúnge deiin Armeniiada koronavirýs juqtyrýdyń 64 oqiǵasy anyqtaldy.
«17 naýryz kúni saǵat 12:00-degi (Nur-Sultan ýaqytymen saǵat 14:00) jaǵdai boiynsha, testileýden keiin virýsty juqtyrýdyń jańadan 12 oqiǵasy tirkeldi. Onyń altaýy Echmiadzin qalasynda bolsa, qalǵan altaýy Erkvendegi kásiporyn jumysshylary. Barlyq naýqas bastapqyda oqshaýlanǵan. Qazirgi ýaqytta bizde 64 jaǵdai tirkeldi, onyń bireýi jazylyp ketti», - dedi Armeniia Densaýlyq saqtaý ministrliginiń baspasóz qyzmetinen.
Sondai-aq, tótenshe jaǵdai rejimi jaǵdaiynda jumys isteitin komendatýranyń basshysy, vitse-premer Tigran Avinian 17 naýryzdan bastap Armeniiaǵa kirýge tyiym salynatyn elderdi atady. Bul elderden kelgen Armeniia azamattary mindetti túrde eki aptalyq karantinnen ótýi kerek. Bul memleketterge Qytai, Iran, Ońtústik Koreia, Japoniia, Italiia, Ispaniia, Frantsiia, Germaniia, Shveitsariia, Daniia, Avstriia, Belgiia, Norvegiia, Shvetsiia, Niderlandy, Ulybritaniia kiredi.
Eske salaiyq, Armeniiada koronavirýs juqtyrǵan alǵashqy jaǵdai 1 naýryzda tirkeldi. Eki aptalyq karantinnen keiin naýqas aýrýhanadan jazylyp shyqqan.
El úkimeti 16 naýryz ben 14 sáýir aralyǵynda tótenshe jaǵdai engizdi.
