Armeniiada «Abai-175» jinaǵy tanystyryldy, dep habarlaidy "Ult aqparat" QR Syrtqy ister ministrliginiń resmi saityna silteme jasap.
Saittaǵy materialdarǵa qaraǵanda, qazaqtyń uly aqyny men oishyly Abai Qunanbaevtyń 175-jyldyǵyna orai armian tilinde «Abai-175» atty mereitoilyq jinaǵynyń tusaýkeseri beinekonferentsiia formatynda ótti. Atalǵan jinaq eki kitaptan turady. Olar «Qara sózder» men Muhtar Áýezovtiń jańartylǵan redaktsiiasyndaǵy «Abai joly» atty romany.
Ádebi jinaq «Rýhani jańǵyrý» baǵdarlamasy aiasynda Qazaqstannyń Armeniiadaǵy Elshiliginiń bastamasymen Erevan memlekettik ýniversiteti men belgili «BZEZ» baspasynyń qoldaýymen jaryq kórdi.
Is-sharany ashqan Qazaqstannyń Armeniiadaǵy Elshisi Timýr Orazaev óziniń sózinde M.Áýezovtiń «Abai joly» romany alǵashqy ret armian tilinde sonaý 1952 jyly jaryq kórip bibliografiialyq sirek kezdesetin shyǵarmaǵa ainalǵany týraly atap ótti.
Onyń aitýynsha, qazirgi jańartylǵan, armian tilindegi ekinshi shyǵarylym, shyǵarmashylyq toppen jańa tildik redaktsiiasynda, sondai-aq redaktorlardyń tarihi-filologiialyq jazbalarymen qosa, qazirgi armian tiliniń qaǵidalaryna sai jasalypty.
Armeniianyń Bilim, ǵylym, mádeniet jáne sport ministriniń orynbasary Artýr Martirosian óziniń quttyqtaý sózinde Abai qazaqtyń uly dalasynda birinshi jáne teńdessiz zaiyrly aqyn ekenin atap ótti.
«Abaidyń ádebi shyǵarmasy bir ýaqytta óziniń teńdessiz ári biregeiligimen úlken áser qaldyrdy» - dedi A.Martirosian.
Al sharanyń aldynda Ulttyq Jinalys depýtaty, «Qazaqstan-Armeniia» dostyq tobynyń múshesi Arman Abovian: «Abai maǵan óziniń dúnietanymymen, filosofiiasymen jaqyn. Ol óziniń oi-syrlary men eńbekterinde shartty Batys pen Shyǵysty bailanystyrdy», - dedi.
Qazaqstan Jazýshylar odaǵy tóraǵasynyń orynbasary Baýyrjan Jaqyp qatysýshylardyń nazaryn Abaidyń alǵashqy armian tilindegi «Qara sózderine» aýdardy. Osylaisha, Armeniiadaǵy oqyrmandary men álemdegi milliondaǵan armian diasporasyna qazaqtyń uly aqyny jáne oishylynyń filosofiialyq prozasymen tanysýǵa múmkindik berdi.
Qazaqstan Respýblikasy Syrtqy ister ministrliginiń Erekshe tapsyrmalar jónindegi Elshisi Batyrhan Qurmanseiit armian tarapyn Abaidyń shyǵarmalaryn aýdarý barysynda kórsetken qajyrly eńbegi úshin alǵys bildire otyra, jinaqtyń bolashaqta armiandyq ǵylymi orta men stýdenttik toptar úshin qundy ádebi shyǵarma bolatynyn aitty.
Jinaqty jaryqqa shyǵarý maqsatynda ter tókken armian jáne qazaqstandyq mamandar boldy. Ásirese túrkitanýshy, professor Aleksandr Safarian, aýdarmashy Arman Safarian, aqyn-aýdarmashy Varýjan Hastýrdyń enbekteri óte zor. Al shyǵarylym úshin arnaiy sýretter qazaqstandyq sáýletshi Nurlan Boranbaevtyń qolynan shyqty.
«Aldaǵy ýaqytta atalǵan kitaptar Armeniianyń jetekshi kitaphanalary men ýniversitetterine, sondai-aq qazaqstandyq ǵylymi uiymdarǵa, qorlarǵa, ýniversitetterge jetkiziledi. Sondai-aq, kúzde armian tilinde «Abai-175» jinaǵynyń nusqasy elektrondyq tuǵyrnamalary - Kindle, iOS jáne Android úshin shyǵarý josparlanýda», - delingen taratylǵan aqparatta.
