Armeniia prezidenti Armen Sarkisian ókileti aiaqtalmai jatyp qyzmetinen ketti. Bul týraly aqparat 23 qańtarda onyń resmi saitynda jariialandy. Sarkisian el saiasatyna, soǵys pen beibitshilik máselesine yqpal etetindei ókileti bolmaǵandyqtan, osyndai sheshim qabyldaǵanyn málimdegen.
68 jastaǵy saiasatker Armeniiany 2018 jyldyń kókteminen beri basqardy. 1996-1997 jyldary ol tórt ai premer-ministr qyzmetin atqarǵan.
Armeniia - parlamenttik respýblika, keń ókileti joq prezident laýazymy tek resmi mańyzǵa ie. Bul qyzmetke úmitker jeti jyldyq merzimge bir-aq ret sailana alady.
Armen Sarkisian Armeniia eldegi júieli máselelerdi sheshýde prezident "óz áleýetin tolymdy paidalana almaityn el ekenin" jazǵan. Qazirgi jaǵdaida "prezidenttiń qolynda eline kómektese alatyn tetikter joq" deidi ol.
Óz biligi tusynda konstitýtsiialyq ózgeris engizý týraly komissiia qurylǵanyn atap ótken Sarkisian, konstitýtsiiaǵa ózgeris engizý arqyly kelesi prezident "teńestirilgen ortada" jumys isteýge múmkindik alatynyna senimdi.
Zań boiynsha, prezident qyzmetten ketý jóninde ótinish jasai alady. Ol ashyq jariia etilgende ótinishi qabyldanǵan bolyp esepteledi. Jańa prezident sailanǵansha, onyń qyzmet mindetin parlament tóraǵasy atqarady. Prezidentti parlament depýtattary sailaidy.
Kezekten tys sailaý prezident qyzmeti bos dep jariialanǵan sátten bastap keminde 25 kún ótkennen keiin, biraq 35 kúnnen keshikpei ótýi tiis.
2018 jyldyń kókteminde Armeniia parlamenti Armen Sarkisiandy prezident etip sailaǵan. Kóp uzamai elde jappai narazylyq bolyp, nátijesinde premer-ministr qyzmetine soǵan deiin oppozitsiiaǵa jetekshilik etken Nikol Pashinian sailandy.
