Armeniia men Ázerbaijan Máskeýde ótken konsýltatsiialardyń qorytyndysy boiynsha málimdeme qabyldady, taraptar tutqyndardy, sondai-aq qaza tapqandardyń máiitterin almasý úshin gýmanitarlyq maqsatta 10 qazanda saǵat 12:00-den bastap atysty toqtatý týraly ýaǵdalasty, dep habarlaidy TASS agenttigi.
Resei Federatsiiasynyń Prezidenti V.V. Pýtinniń úndeýine jaýap retinde jáne Resei Federatsiiasynyń Prezidenti V.V. Pýtinniń, Ázerbaijan Respýblikasynyń Prezidenti I.G. Álievtiń, sondai-aq Armeniia Respýblikasynyń Premer-Ministri N.V. Pashiniannyń ýaǵdalastyqtaryna sáikes taraptar mynadai qadamdar týraly kelisti:
1. 2020 jylǵy 10 qazanda saǵat 12:00-den bastap áskeri tutqyndardy jáne basqa da ustalǵan adamdar men deldaldyq kezinde qaza tapqan adamdardyń máiitterin almasý úshin jáne Halyqaralyq Qyzyl Krest komitetiniń kriteriilerine sáikes gýmanitarlyq maqsatta atysty toqtatý týraly sheshim jariialanady.
2. Atysty toqtatý rejiminiń naqty parametrleri qosymsha kelisiledi.
3. Ázerbaijan Respýblikasy men Armeniia Respýblikasy EQYU-nyń Minsk tobynyń teń tóraǵalarynyń deldaldyǵy arqyly bitimgershiliktiń bazalyq qaǵidattary negizinde beibit kelisimge jedel qol jetkizý maqsatynda sýbstantivtik kelissózderge kirisedi.
4. Taraptar kelissózder protsesi formatynyń ózgermeitinin rastaidy.
Buǵan deiin habarlanǵandai, Resei prezidenti Vladimir Pýtin Armeniia men Ázerbaijannyń SIM basshylaryn Máskeýge Taýly Qarabaq qaqtyǵysy kezinde qaza tapqandardyń máiitteri men tutqyndardy almasý máseleleri boiynsha keńesýge shaqyrdy. Resei, Ázerbaijan jáne Armeniia syrtqy saiasi vedomstvolary basshylarynyń kelissózderi 10 saǵattan astam ýaqytqa sozyldy.
Lavrovtyń sózinshe, «tynyshtyq tártibiniń» naqty erejeleri qosymsha kelisiledi.
Armeniia da, Ázerbaijandy bul málimdemeni áli rastamady.
Máskeýdegi kelissóz bastalǵanda Ázerbaijan prezidenti Ilham Áliev Armeniiaǵa shielenisti beibit jolmen sheshý úshin "sońǵy múmkindik" beretinin málimdegen.
"Shielenis qazir áskeri jolmen sheshilip jatyr, saiasi jolǵa sodan keiin júginemiz" dedi ol osyǵan deiingi kelissózderdiń nátijesiz aiaqtalǵanyn atap ótip. "Otyz jylǵa jýyq kelissóz júrgizip kelemiz. Ózgeris boldy ma? Bizge jerimizdiń santimetrin bolsa da qaitardy ma?".
Taýly Qarabaq halyqaralyq deńgeide Ázerbaijannyń jeri sanalady. Biraq ol 1990-jyldardan beri etnikalyq armiandardyń baqylaýynda. Sovet Odaǵy ydyraǵanda Erevannyń qoldaýyna ie armian separatisteri Ázerbaijannan bólinip shyǵatynyn málimdep, arty Ázerbaijan men Armeniia arasyndaǵy soǵysqa ulasty. Alty jylǵa sozylǵan soǵys 1994 jylǵy kelisimmen toqtady. Biraq beibitshilik tolyq ornaǵan joq, ara-arasynda qaqtyǵystar bolyp turdy. Sol ýaqyttan beri Taýly Qarabaq etnikalyq armiandardyń qolynda. Soǵys saldarynan júzdegen myń ázerbaijan bosqynǵa ainaldy.
"Halyqaralyq daǵdarys toby" uiymynyń (ICG) Ońtústik Kavkaz jónindegi sarapshysy Zaýr Shiriev Ázerbaijan halqy beibitshilik jónindegi kelissózderge oralýǵa qulyqty emes deidi.
Twitter jelisindegi jazbasynda Shiriev ázerbaijandardyń Álievten "paidasyz kelissózge oralmaýdy talap etip otyrǵanyn" jazdy.
