Armeniia premer-ministri Nikol Pashinian jáne Ázerbaijan prezidenti Ilham Áliev Taýly Qarabaq máselesin kelesi aida Briýssellde talqylamaq. Bul jóninde Eýroodaqtyń 19 qarasha kúngi habarlamasynda aitylǵan, dep habarlaidy Azattyq.
"Eki el basshysy Ońtústik Kavkazda turaqtylyq pen igilikke kedergi keltiretin jáittardy jeńý joldaryn Briýsselde kezdesip, talqylaýǵa kelisti" delingen málimdemede.
Jiyn 15 jeltoqsanda Eýropanyń shyǵys aimaqtaǵy áriptestigine arnalǵan sammit aiasynda ótedi. Buǵan deiin Eýropa keńesiniń jetekshisi Sharl Mishel Ilham Áliev jáne Nikol Pashinianmen telefonmen sóilesken.
"Telefon arqyly áńgime barysynda armian jáne ázerbaijan basshylary qorǵanys ministrlikteri deńgeiinde tikelei bailanys ornatyp, aldyn alý tetikterin iske qosýǵa kelisti" delingen EO málimdemesinde.
Byltyr qarashada Armeniia men Ázerbaijan Máskeýdiń aralasýymen 44 kúnge sozylǵan, 6 myńnan astam adamnyń ómirin qiǵan Taýly Qarabaqta soǵysty toqtatý jóninde ortaq málimdemege qol qoiǵan. Biraq sodan beri taraptar arasynda jaǵdai aýyq-aýyq ýshyǵyp keledi.
Bir jyldan astam ýaqyt ishinde eki el basshysy betpe-bet eki ret kezdesken. Sońǵy ret Máskeýde kezdesip, oǵan Resei prezidenti Vladimir Pýtin qatysqan.
Ázerbaijan men Armeniia shekarasy arasynda jaǵdai osy apta basynda taǵy bir órshigen. Sarapshylar ony byltyrdan bergi qaqtyǵystardyń "eń irisi" dep ataidy.
