Reseilik mediamenedjer Arman Dáýletiiarov "Mýz-TV" arnasynyń bas direktory qyzmetinen ketetinin habarlady.
"Elýge tolǵan soń ári qarai jańa maqsattar men jetistikterge jetý úshin ózimdi taǵy synaǵym keletinin túsindim. "MÝZ-TV" arnasyndaǵy qyzmetimnen ketemin, alaida meniń júregim men janym máńgige sol jerde qalady", - dep jazdy Dáýletiiarov Instagram paraqshasynda.
Dáýletiiarov ashylǵanyna 25 jyl bolǵan telearnanyń jetistigin atap ótti.
"Tynyshtyq taýyp, arnadan alystai alatyn ýaqyt keldi. Men "Mýz-TV" arnasynyń bastaýynda turdym, arna alǵashqy qadamyn jasaǵan kezde osynda jumys istei bastadym. 25 jyldyń 20 jylynda birge boldyq, arnamen birge ártister men kórermenniń birneshe býyny qatar óskenine qýanyshtymyn", - dep jazdy ol.
Sondai-aq, telearnadaǵy qyzmetkerlerge, aktsionerler men án áleminiń ókilderine alǵys bildirdi.
Aita keteiik, Arman Dáýletiiarov – etnikalyq qazaq, Reseide turady. 1970 jyly 13 tamyzda Orynbor oblysy Tamar-Ýtkýl degen shaǵyn aýylda dúniege kelgen. Otbasynda úsh balanyń kenjesi. Mektepti bitirgen soń Máskeýge baryp, 1985 jyly kásiptik-tehnikalyq ýchilisheni (kolledj) qyzyl diplommen bitirdi.
2001 jyly Dáýletiiarov "Mýzykalyq birlik" ("Mýzykalnoe edinstvo") prodiýserlik kompaniiasyn ashty. 2003 jyly Resei federatsiiasy memlekettik dýmasy depýtatynyń kómekshisi boldy, Orynbor oblysyndaǵy №131 bir mandatty okrýg boiynsha daýysqa tústi.
A'Studio, "Dinamit", Murat Nasyrov, Batyrhan Shúkenov jáne basqa da kóptegen tanymal mýzykalyq toptarmen jáne ártistermen jumys istedi.
2010 jyly Arman Dáýletiiarov Elbasy Nursultan Nazarbaevtyń jarlyǵymen "Qurmet" ordenimen marapattaldy.
2017 jyly oǵan Qazaqstan Respýblikasynyń eńbek sińirgen qairatkeri ataǵy berildi.
2020 jyldyń tamyzynda Qazaqstan prezidenti Qasym-Jomart Toqaev Qazaqstan men Resei arasyndaǵy yntymaqtastyqty nyǵaitýdaǵy úlesi úshin alǵys aitty.
2020 jyly Resei prezidenti Vladimir Pýtin Dostyq ordenimen marapattady.
