QR Úkimet basshysy Asqar Mamin ulttyq arhiv qoryn qalyptastyrý men saqtaýǵa qatysty atqarylatyn sharalar týraly aityp berdi, dep habarlaidy "Ult aqparat".
«Úkimet zamanaýi arhiv qyzmetin qurýǵa erekshe nazar aýdaryp otyr. Osy baǵyttaǵy mamandyqtyń mártebesin kóterý úshin biylǵy qańtardan bastap 2 myńnan astam arhiv qyzmetkeriniń eńbekaqysyn kóterdik. Respýblikalyq arhiv qyzmetkerleriniń jalaqysy - 50 paiyzǵa, óńirlik arhiv qyzmetkeriniń jalaqysy - 35 paiyzǵa ósti. Bul maqsatqa 2020-2022 jyldardaǵy respýblikalyq biýdjetten 2,8 mlrd teńge qarastyryldy» delingen Asqar Maminniń senatorlardyń depýtattyq saýalyna bergen jaýabynda.
Úkimet basshysynyń aitýynsha, «Tsifrlyq Qazaqstan» memlekettik baǵdarlamasy aiasynda «Elektrondy qujattardyń biryńǵai arhivi» aqparattyq júiesin qurý jumysy atqarylyp jatyr.
Osy júieni iske qosý memlekettik arhivterdiń jumysyn tolyqtai avtomattandyrýǵa, elimizdiń ulttyq arhiv qorynyń elektrondy qujattaryn uzaq merzimde saqtaýǵa múmkindik beredi.
