Sáýir aiynan keiin Qostanai oblysynla ataýly áleýmettik kómek alatyndardyń sany 5 esege ósken. Bul týraly oblys ákimdiginde ótken keńeitilgen otyrysta Jumyspen qamtýdy úilestirý jáne áleýmettik baǵdarlamalar basqarmasynyń basshysy Gúlnár Ábenova aitty, dep habarlaidy QazAqparat.
Qostanai oblysynda jyl basynda ataýly áleýmettik kómek 8 myńdai adamǵa berilse, qazir olardyń sany 40 myńǵa jýyqtap otyr. Osylaisha, óńirde 8 289 otbasyna 1711,4 mln teńge kóleminde ataýly áleýmettik kómek berilgen. Gúlnár Ábenovanyń aitýynsha, ataýly áleýmettik alatyndardyń 2148-i – kóp balaly otbasylar. Al 2 jarym myńǵa jýyq adam eńbekke qabiletti jasta.
«Búginde «Eńbek» baǵdarlamasy boiynsha kóp balaly jáne turmysy tómen azamattardy, jastardy jumyspen qamtý úshin qosymsha qarjy bólingen. Bul qarjy «Bastaý biznes» kásipkerlik jobasy aiasynda jumyssyzdarǵa shaǵyn nesieler bólip, olardyń kásipkerlikpen ainalysýyna yqpal etedi. Biz bul jumystardy áli de júielei túsetin bolamyz. Ásirese, jas mamandarǵa kóp kóńil bólinedi», - dedi basqarma basshysy.
Oblys ákimi Arhimed Muhambetov barlyq aýdandar men qalalarda ataýly áleýmettik kómek alýshylardy anyqtaý barysynda muqiiat bolýdy tapsyrdy.
«Keibir azamattar ataýly áleýmettik kómek alý úshin ótirik ajyrasý, jumystan shyǵý, óz múlkin basqaǵa jazý arqyly tabysyn azaityp kórsetý, qolyndaǵy malyn soiyp tastaý siiaqty alaiaqtyqqa barady. Buǵan jol bermeý kerek. Sondyqtan barlyq aýdandar men qalalarda ataýly kómek bólýdi qatań baqylaýǵa alyp, kez kelgen alaiaqtyq pen jemqorlyqty qatań jazalaý kerek. Kómek ataýly túrde kórsetilýi tiis. Bul – Úkimet otyrysynda Memleket basshysy Qasym-Jomart Toqaevtyń barlyq óńirlerge bergen tikelei tapsyrmasy. Áleýmettik baǵdarlama az qamtylǵan otbasylardyń ómir súrý sapasyn jaqsartýǵa baǵyttalǵan. Sondyqtan ataýly áleýmettik kómek halyqty masyldyqqa emes, eńbekke yntalandyrýy tiis», - dedi oblys basshysy.
A.Muhambetov aýdan jáne qala ákimdikterine memlekettik baǵdarlamalardyń múmkindikterin tiimdi paidalana otyryp, eńbekke qabiletti ataýly áleýmettik kómek alýshylardy turaqty jumyspen qamtý, olardyń turmysyn jaqsartý baǵytyndaǵy sharalardy jalǵastyrýdy tapsyrdy.
