"Arqankergen" qosynynda birneshe adamdy óltirgeni úshin jazasyn ótep jatqan Vladislav Chelahtyń isin Joǵarǵy sot qaraidy.
Joǵarǵy sot sottalǵan Chelahtyń isti qaita qaraý týraly ótinishin qanaǵattandyrǵanyn rastady, dep habarlaidy Sputnik Qazaqstan. Ótinish birikken ulttar uiymynyń adam quqyqtaryn qorǵaityn komitetiniń sheshimimen bailanysty.
Joǵarǵy sottyń qylmystyq ister jónindegi sot alqasy Chelahtyń isin 2019 jyldyń 22 qańtarynda qaita qaraidy. Sotta Chelahtyń bolyp-bolmaýy belgisiz. Sottyń onymen videokonferentsiia arqyly bailanysqa shyǵý múmkindigi bar.
Vladislav Chelahtyń isin qarasha aiynda BUU-nyń adam quqyqtary jónindegi komiteti qarady. Uiymnyń kómegine marqum advokat Serik Sársenov júgingen edi.
BUU komitetindegiler Chelahtyń isin qaraýda halyqaralyq azamattyq jáne saiasi quqyqtar paktisi buzyldy degen sheshim shyǵardy.
Arqankergendegi qandy qyrǵyn
Qazaqstan men Qytai shekarasyndaǵy "Arqankergen" qosynyndaǵy eldi eseńgiretken qaiǵyly oqiǵa 2012 jyldyń mamyr aiynda boldy. Tergeý 19 jastaǵy Vladislav Chelah 14 qyzmettesi men egerdi óltirip, keiin kazarma men adamdardyń máiitin órtep jiberdi.
Sot Chelahty 15 adamnyń ólimi úshin kináli dep taýyp, ómir boiyna bas bostandyǵynan aiyrdy. Dál qazir Chelah túrme jargony boiynsha "Qara búrkit" degen ataýǵa ie bolyp júrgen koloniiada jazasyn ótep jatyr.
