Foto: Facebook.com
Jetisý oblysynyń Aqsý aýdanyna qarasty Balasaz aýylynda jaǵa ustatar oqiǵa boldy. 32 jastaǵy Aizat Jumanovany kúieýi qatygezdikpen óltirgen. Qandy qylmysty marqumnyń jubaiy Aibar Janbolat jasady degen kúdik bar, dep habarlaidy Azattyq Rýhy.
Jelide taraǵan málimetke júginsek, marqumnyń týystary kóp saǵat boiy azaptalǵanyn aitady. Kúieýi áielin eki jasar búldirshininiń kózinshe qatygezdikpen uryp-soqqan. Budan bólek, ony arqanmen qolynan bailap, jylqymen súiregeni de aityldy.
Meditsinalyq qorytyndyda kórsetilgen jaraqattar:
- - Bas-mi jaraqaty (ZChMT);
- - Mi isinýi;
- - Bas súiegi negiziniń synýy;
- - Jambas jáne aiaq-qol súiekteriniń kóp jerden synýy;
- - Teriniń birneshe jerden sylynyp ketýi;
- - Býyn bailamdarynyń úzilýi;
- - Qol men bilektegi teriniń tolyqtai syrylyp ketkeni;
- - Denede jerge súirelý izderi bar.
Kúdikti Aibar Janbolat áieliniń ekinshi qabattan selfi jasap jatyp qulap ketkenin aitqan. Alaida, marqumnyń týystary bul málimdemeni shyndyqqa sai emes dep esepteidi. Olardyń aitýynsha, oqiǵa ornynda qylmystyń izin jasyrý áreketteri de bolǵan.
Aizatty aýrýhanaǵa jetkizbes buryn jýyndyryp, kiimin aýystyrǵan. Onyń ústinde qannyń, jaraqattyń izi bolmaǵan. Bul jaǵdai týystardyń kúdigin kúsheite túsken.
Aizat Jumanova 22 maýsymda túngi saǵat 02:30 shamasynda Taldyqorǵandaǵy oblystyq aýrýhanaǵa jetkizilgen. Alaida dárigerler tek onyń qaitys bolǵanyn ǵana tirkegen. Týystary ol kezde Aizattyń ómirden ótip ketkenin aityp otyr.
Qaiǵyly oqiǵa kezinde eki jasar qyzy barlyq jaǵdaidy kózimen kórgen. Qazir ol aýyr psihologiialyq kúizeliske ushyrap otyr.
«Qyzymyz sóilemeidi. «Mama, mama» dep qana kúbirleidi. Túnde uiyqtamaidy, qarańǵydan qorqady. Barlyǵyn kórdi, biraq aitýǵa shamasy joq», - deidi týystary.
Jetisý oblystyq politsiia departamentiniń málimetinshe, jábirlenýshiniń ólimine ákep soqqan qasaqana aýyr dene jaraqatyn keltirý faktisi boiynsha politsiia tarapynan sotqa deiingi tergep-tekserý júrgizilip jatyr.
«Kúdikti ustalyp, ýaqytsha ustaý izoliatoryna qamaldy. Tergeý isi oblystyq politsiia departamenti basshylyǵynyń erekshe baqylaýynda. Qylmystyq is aiasynda qylmystyń tolyq ári obektivti sipatyn anyqtaýǵa baǵyttalǵan barlyq qajetti protsessýaldyq shara qabyldanyp jatyr. Aiǵaqtar jinalyp, muqiiat saraptama jasalyp jatyr, sot-meditsinalyq saraptamalar taǵaiyndalyp, qazirgi ýaqytta júrgizilip jatyr. Barlyq taraptyń ýájderi men nusqalary tekserilip jatyr», - dep habarlady politsiia.
Belgili bolǵandai, tergeý áreketteri zańnama aiasynda, taraptardyń quqyqtary men zańdy múddelerin qatań saqtai otyryp júrgiziledi. Kináliler zańǵa sáikes tolyq kólemde jaýapqa tartylady.
Qazirgi ýaqytta tergeý múddesine bailanysty basqa aqparat jariia etilmeidi.
