Arqalyqta Torǵai boksit ken basqarmasynyń (TBKB) qyzmetkerlerine arnalǵan alǵashqy bos oryndar jármeńkesi ótti. «Qazaqstan aliýminiii» AQ-nyń bul filialy keleshekte qyzmetin tolyq toqtatady. ERG keleshekte qyzmetten bosaityn mamandaryn eńbekpen qamtýdy kózdegen baǵdarlamasyn júzege asyrýdy jalǵastyrady. Búgingi jármeńkede Top TBKB mamandaryna ERG kásiporyndarynda bosaǵan oryndardan 400-den astam qyzmet usyndy.
Qazirgi tańda Torǵai boksit ken basqarmasynyń qyzmeti májbúrli túrde toqtaǵan. Shikizat óndirisi úsh aiǵa toqtatylǵany týraly sáýir aiynda habarlanǵan bolatyn. Buǵan pandemiia saldary men álemdik metaldar birjasyndaǵy baǵanyń quldyraýy sebep.
Qazirgi tańda TBKB qyzmetkerleriniń sany - 500 adam. Sonyń 281-i kásiporynnyń toqtaýy saldarynan bos otyrsa, 36 adam kezekti eńbek demalysynda.
Osy ýaqyt aralyǵynda TBKB-da buryn óndirilgen boksit pen otqa tózimdi sazdy jóneltý, kásiporyn aktivterin saqtaý men filialdy qýatpen qamtý, kúzetý sharalary atqarylyp keldi. Osylaisha, kásiporynnyń qazirgi qyzmetine 171 adam jumyldyrylǵan.
«Qazaqstan aliýminiii» AQ Torǵai boksit ken basqarmasynyń jumysyn kezeń-kezeńimen 2023 jylǵa qarai tolyq toqtatýǵa bailanysty, Eurasian Resources Group jumystan bosaityn qyzmetkerlerdi eńbekpen qamtýdyń keshendi baǵdarlamasyn ázirlegen. «Atamken» UKP-men birlese arnaiy saraptama júrgizip, óz kásibin ashyp, isin ilgeriletip ketýge nietti qyzmetkerlerdiń tizimi jasalǵan. Keiin olar oqytylyp, kásipkerlik negizderin meńgerdi.
Tek tamyz aiynda 13 maman Krasnooktiabr boksit ken basqarmasyna jumys aýystyrdy. Endi olar vahtalyq ádispen eńbek etip júr. Taǵy 21 adam ERG quramyndaǵy kelesi kásiporyn SSKÓB-ke qyzmet aýystyrǵan. Qos maman qazir Eýraziialyq Top quramyndaǵy «Shubarkól kómir» AQ-da eńbek etip jatyr. Osy oraida, Torǵai boksit ken basqarmasynyń mamandary qyzmet aýystyrýǵa kelisken jaǵdaida, Toptyń keibir kásiporyndary ERG-diń turǵyn úi baǵdarlamasy aiasynda baspana berýge de ázir ekenin atap aitqan jón. TBKB negizinde qurylǵan «ARQALYQREMSERVIC» JShS de josparly qyzmetin jalǵastyra bermek.
Búgin TBKB-nyń keleshekte qyzmetten bosaityn mamandarymen kezekti kezdesý ótti. Bos oryndar jármeńkesine 300-ge jýyq adam qatysty. Eýraziialyq Toptyń HR-blogy men ózge de kompaniialardyń ókilderi búginde bar vakantsiialar, olarǵa qyzmet aýystyrý sharttary týraly keńinen baiandap berdi.
- Áriptesterimizge 400-den astam vakantsiia usynyldy, - dedi «Eýraziiayq Top» JShS personaldy basqarý departamentiniń direktory Aqsyrǵa Ermuhanova. - Bul tek ERG tarapynan usynylǵany. Túrli mamandyqtar boiynsha qyzmet usynyp otyrmyz. Óitkeni olar kompaniia ishinde jumys aýystyrýdan bólek, qaita oqyp, ózge mamandyqtardy da meńgerip alýlaryna bolady. Biliktilikterin arttyrýǵa da múmkindik bar. Óz isin bastaýǵa nietti qyzmetkrelerge biznestiń negizderin oqýǵa da járdemdesýge daiarmyz. Bul baǵyttaǵy jarqyn mysaldyń biri – «ARQALYQREMSERVIC» JShS. Kompaniiany TBKB burynǵy qyzmetkeri Viktor Sýrovtsev qurǵan. Biz ózge áriptesterimizdiń qolynan mundai is kelerine nyq senimdimiz.
Qazirgi tańda Pavlodardaǵy kásiporyndarǵa jetkiziletin boksittegi Torǵai ken basqarmasynyń úlesi nebary 3,4% mejesinde. Pavlodar aliýminii zaýytynyń tolyqqandy jumysyn báseńdetpeý úshin onyń qoimasy Krasnooktriabr boksit ken basqarmasynan jetkiziletin kenmen tolyqtyrylady.
- Bul kenishten shikizat óndirý toqtatylatyny birneshe jyl buryn aitylǵan, - dedi TBKB direktory Manarbek Nurmaǵan. – Geologtardyń boljamy boiynsha torǵailyq boksit qory tipten 2016 jyly túgesilýi tiis edi. Kenishtiń qyzmetin toqtatpaý úshin kompaniia óndiristiń jyldyq mólsherin báseńdetti. Alaida, bul kenish jabylmaidy degen sóz emes qoi. Kenish jumys istep turǵan kezde atqarylǵan is az emes. Bir kezderi Pavlodar aliýminii zaýytynyń tyń tarihyn qalyptastyrǵan óndiris jaily áńgime basqa. Tek sońǵy tórt jylda aimaqtyń áleýmettik-ekonomikalyq damýyna 100 mln teńgeden astam qarajat baǵyttaldy.
Osy oraida, TBKB mamandary ózderi usynǵan Ashyt pen Úshtóbe kenoryndaryn igerýdiń ekonomikalyq tiimdiligi ýaqytyly saralanǵanyn da aita ketken jón. Alaida, osy saladaǵy bilikti de táýelsiz quzyrly uiymdardyń saraptamasy olardy igerý men ondaǵy óndiris tehnkalyq-ekonomikalyq turǵyda tiimsiz ekenin kórsetti. Úshtóbe ken ornyna qatysty derekter sonaý 2013 jyly, al Ashyt telimderiniń 7 jáne 15 ýchaskelerine qatysty túpki saraptamalar aqpan aiynda jariialandy. Iaǵni, atalǵan kenishterdi igerý tek shyǵynǵa ushyratady.
Bas-aiaǵy 60 jyldan astam ýaqytta 1,5 mlrd. m3 taý-ken massasy arshylyp, 80 mln tonnadan astam boksit pen 20 mln tonna otqa tózimdi saz alyndy. Jabylý protsesine qatysty sońǵy sheshim qabyldaǵan soń kompaniia taý-ken qyzmeti saldarynyń qorshaǵan ortaǵa áserin azaitý qamyna kirisedi. Sonyń ishinde úiindilerdi tehnikalyq jáne biologiialyq qalpyna keltirý.
