Jambyl oblysynda áriptesiniń úiine eki ret zańsyz kirip, altyn buiymdaryn urlaǵan muǵalimge qatysty sot úkimi shyqty, dep habarlaidy ult.kz.
Is materialdaryna sáikes, sottalýshy jábirlenýshimen bir mektepte muǵalim bolyp jumys istegen. Ótken jyly jábirlenýshiniń týǵan inisi úi kiltin suraǵan sátte kilttiń qaida saqtalatynyn estip qalǵan áiel osyny paidalanyp, birneshe kúnnen keiin jumystan erterek shyǵyp, kiltti alyp, áriptesiniń úiine zańsyz kirgen. Alǵashqy joly altyn kýlon men saqinany urlaǵan.
Birneshe kúnnen keiin ol dál osy tásilmen úige qaita kirip, altyn alqa men bilezikti alyp ketken.
Sot barysynda aiyptalýshynyń kinási tolyq dáleldendi. Memlekettik aiyptaýshy oǵan 3 jyl 6 ai merzimge bas bostandyǵynan aiyrý jazasyn surady. Jábirlenýshi keltirilgen materialdyq shyǵynnyń tolyq ótelgenin málimdedi.
Sot áieldi Qylmystyq kodekstiń 188-babynyń 3-bóligimen (birneshe ret jasalǵan urlyq) kináli dep tanyp, 3 jylǵa bas bostandyǵynan aiyrý jazasyn taǵaiyndady.
Alaida sot onyń 14 jasqa tolmaǵan balasynyń bolýyn eskerip, jazany óteý merzimin 3 jylǵa keiinge qaldyrdy. Úkim zańdy kúshine endi.
