Foto: macovod.com.ua
Áriptesiniń úiine qonaqqa baryp, telefonyn urlap, nesie rásimdegen shymkenttik turǵyn bas bostandyǵynan aiyryldy, – dep habarlaidy Polisia.kz.
IIM baspasóz qyzmetiniń málimetinshe, Turan aýdanynyń turǵyny qymbat markaly telefony urlanǵanyn aityp, politsiiaǵa aryzdanǵan.
Jábirlenýshiniń aitýynsha, ury budan bólek smartfon arqyly bank qosymshasynan 1 mln teńgeden astam onlain-nesie rásimdep úlgergen. Bul týraly er adam barlyq mobildi baǵdarlamalardy jańa uialy telefonǵa júktegen kezde bilgen.
"Tergeýshiler atalǵan derekke qatysty QR QK-niń 188-baby 2-bóliginde kózdelgen (Aqparattyq júiege zańsyz qol jetkizý arqyly jasalǵan urlyq) boiynsha tergeýdi bastady. Kriminaldyq politsiia qyzmetkerleri kúdiktininiń jeke basyn anyqtaýǵa jáne ony ustaýǵa baǵyttalǵan qajetti is-sharalardy qabyldady.
Belgili bolǵandai, aryzdanýshynyń úiine túski asqa shaqyrylǵan áriptesi uialy telefondy zańsyz iemdenip, nesie rásimdegen. Kúdikti sol kúni politsiia basqarmasyna jetkizildi. Tergeýshiler onyń telefondy tanysyna satyp jibergenin anyqtady. Urlanǵan múlik zańdy iesine qaitaryldy" - delingen habarlamada.
Barlyq aiǵaqty jinaǵan politseiler qylmystyq isti aiyptaý aktisimen birge sotqa jiberdi. Sot úkimine sáikes, bul qylmysty jasaǵany úshin er adam bir jylǵa bas bostandyǵynan aiyryldy.
