Búgin Memleket basshysy «Ardagerler týraly» Zańǵa qol qoidy. Zań boiynsha ardagerler sanatyna Ekinshi dúniejúzilik soǵysqa qatysýshylardan bólek, basqa memleketterdiń aýmaǵyndaǵy urys qimyldarǵa qatysýshylar da kirgen. Osyǵan orai QR Prezidentiniń baspasóz hatshysy Berik Ýáli Facebook-tegi paraqshasynda ardagerler sanatyna taǵy kimder enetinin atap ótti.
***
Jańa Zań ardagerlerge arnalǵan jeńildikterdi júielep, retteidi. Memleket tarapynan qoldaýǵa ie bolatyn tulǵalardyń tizimi keńeitilip, naqtylandy. Jalpy, atalǵan zań barlyq ardagerlerge, sonyń ishinde maidangerler men tylda jumys istegen eńbekkerlerge tiimdi áleýmettik-quqyqtyq qoldaý kórsetýge múmkindik beredi.
Zań boiynsha ardagerler sanatyna kiretin adamdardyń qatary keńeitilgen. Ardagerler qataryna Ekinshi dúniejúzilik soǵysqa qatysýshylardan bólek, basqa memleketterdiń aýmaǵyndaǵy urys qimyldarǵa qatysýshylar, jeńildikter boiynsha Uly Otan soǵysynyń ardagerlerine teńestirilgen adamdar jáne eńbek ardagerleri kirgen.
Osy jerde «Basqa memleketterdiń aýmaǵyndaǵy urys qimyldarynyń ardagerlerine kimder jatady?» degen máseleniń basyn ashyp kórsetken durys shyǵar. Olar:
1) burynǵy KSR Odaǵynyń úkimettik organdarynyń sheshimderine sáikes basqa memleketterdiń aýmaǵyndaǵy urys qimyldaryna qatysqan Keńes Armiiasynyń, Áskeri-Teńiz Flotynyń, Memlekettik qaýipsizdik komitetiniń áskeri qyzmetshileri, burynǵy KSR Odaǵy Ishki ister ministrliginiń basshy jáne qatardaǵy quramynyń adamdary (áskeri mamandar men keńesshilerdi qosa alǵanda);
2) oqý jiyndaryna shaqyrylǵan jáne Aýǵanstanǵa urys qimyldary júrip jatqan kezeńde jiberilgen áskeri mindettiler;
3) Aýǵanstanǵa urys qimyldary júrip jatqan kezeńde osy elge júk jetkizý úshin jiberilgen avtomobil batalondarynyń áskeri qyzmetshileri;
4) burynǵy KSR Odaǵynyń aýmaǵynan Aýǵanstanǵa jaýyngerlik tapsyrmalarmen ushqan ushý quramynyń áskeri qyzmetshileri;
5) Aýǵanstandaǵy keńestik áskeri kontingentke qyzmet kórsetken, jaraqat, kontýziia alǵan nemese mertikken ne urys qimyldaryn qamtamasyz etýge qatysqany úshin burynǵy KSR Odaǵynyń ordenderimen jáne medaldarymen nagradtalǵan jumysshylar men qyzmetshiler;
6) Tájikstan-Aýǵanstan ýchaskesinde Táýelsiz Memleketter Dostastyǵynyń shekarasyn qorǵaýdy kúsheitý jónindegi memleketaralyq sharttar men kelisimderge sáikes mindetterin oryndaǵan Qazaqstan Respýblikasynyń áskeri qyzmetshileri;
7) Iraktaǵy halyqaralyq bitimgershilik operatsiiaǵa bitimgerler retinde qatysqan Qazaqstan Respýblikasynyń áskeri qyzmetshileri;
8.) Taýly Qarabahtaǵy etnosaralyq qaqtyǵysty retteýge qatysqan áskeri qyzmetshiler, sondai-aq burynǵy KSR Odaǵy ishki ister jáne memlekettik qaýipsizdik organdarynyń basshy jáne qatardaǵy quramynyń adamdary.
Jalpy alǵanda jańa Zańda ardagerlerdiń mártebesi aiqyndalyp, olarǵa kórsetiletin kómekterdiń dárejesi jan-jaqty anyqtalyp, naqtylanǵan.
Jaqynda Prezident Qasym-Jomart Toqaev «MIR» teleradio keshenine suhbat berdi. Suhbat barysynda «Ardagerler týraly» jańa Zań jaiynda aita kelip, Jeńistiń 75 jyldyǵyna orai maidangerlerge kórsetiletin kómek týrasyna da toqtaldy.
– Árbir maidangerge 1 million teńge kóleminde kómek beriledi. Bul shamamen 2500 dollardy quraidy. Tylda eńbek etken ardagerler de nazardan tys qalmaidy. Árbir qazaqstandyqtyń otbasynda soǵystyń salǵan izi bar. Sondyqtan 9 mamyr – biz úshin eske alý kúni, – dedi Memleket basshysy.
