Ortalyq aýdandyq aýrýhana 150 adamǵa, al mektep 300 orynǵa arnalǵan. Qyzylorda oblysy ákimi Q.Kósherbaev aýdanǵa jumys sapary barysynda aýdandyq aýrýhana men mekteptiń ashylý rásimine qatysty.
150 oryndyq aýrýhananyń ǵimaraty 3 qabat, 4 bloktan turady. Onyń ishinde terapiia, hirýrgiia, travmatologiia, pediatriia, ginekologiia, infektsiialyq jáne dermatovenerologiialyq bólimsheler qyzmet kórsetedi.
Oblys ákimi aýrýhana ujymyn jańa nysannyń ashylýymen quttyqtady.
«Qazirgi tańda Elbasy tapsyrmasymen memlekettik-jekemenshik áriptestik aiasynda memleket pen jeke sektor arasynda uzaq merzimdi yntymaqtastyqty qalyptastyrýǵa baǵyttalǵan jumystar júrip jatyr. Oblys boiynsha bilim, densaýlyq, sport, jalpy áleýmettik salalar boiynsha 52 nysannyń jobasy ázirlenip jatyr. Ótken jyly Qazaly temirjol aýrýhanasynyń bazasynda Aral, Qazaly, Qarmaqshy aýdandarynyń turǵyndary úshin aýdanaralyq insýlttyq ortalyq, Baiqońyr qalasynan kópsalaly aýrýhana ashyldy. Qajetti mamandardy rezidentýraǵa daiyndaý maqsatynda oblys ákiminiń grantyn bóldik, qazir 22 maman oqyp jatyr»,-dedi aimaq basshysy.
Aita keteiik, sońǵy 2 jylda meditsinalyq uiymdardyń materialdyq-tehnikalyq bazasy nyǵaitylyp, barlyq aýdandarda aýysymyna 250 kelýshige arnalǵan emhanalar men 11 meditsinalyq beket salyndy. Ótken jyldyń jeltoqsanynda Qazaly aýdandyq ortalyq aýrýhanasy paidalanýǵa berildi. Oblystyń densaýlyq saqtaý salasynyń materialdyq-tehnikalyq bazasyn jaqsartý maqsatynda 48 dárigerlik ambýlatoriia, 7 feldsherlik-akýsherlik beket, 27 meditsinalyq beket qurylysy josparlanýda. Meditsinalyq uiymdardy arnaiy tehnikamen qamtamasyz etý boiynsha álemniń kez-kelgen klinikasymen bailanysqa túsýge múmkindik beretin mobildi – ota jasaityn qondyrǵy ornatyldy. Mundai qondyrǵymen respýblikanyń 5 klinikasy ǵana jabdyqtalǵan.
Sonymen qatar, qazirgi ýaqytta oblystyń meditsinalyq mekemelerin meditsinalyq jabdyqtarmen qamtamasyz etý kórsetkishi 45,19% - dan 73,4% - ǵa deiin ósti. Jalpy eki jyl ishinde 3,1 mlrd.teńgege meditsinalyq jabdyqtar satyp alyndy.
Sondai-aq, búgin aýdan ortalyǵynda № 14 mektep-litseiiniń ashylý rásimi ótti. Munda dárishanalardan basqa ashana, akt zaly, kitaphana, sport zaly jáne mektep aýlasynda sport alańy bar. Sonymen qatar, robototehnika kabineti, voleibol sektsiiasy jáne sheberhana jumys isteidi.
Aimaq basshysy ustazdar men ata-analardy mektep-litseidiń ashylýymen quttyqtady.
"Deni saý jáne bilimdi, básekege qabiletti urpaǵymyzben órkenietti 30 eldiń qataryna kirýge tolyq múmkindigimiz bolady. Mekteptiń jańa ǵimaraty pedagogikalyq ujymǵa bilim berý júiesiniń aldynda turǵan mindetterdi sheshýge kómektesedi dep senemin. Al mindetter óte aýqymdy-bul adam kapitalyn damytý. Sarapshylardyń baǵalaýy boiynsha, Batys Eýropa elderinde adam kapitalynyń jalpy ishki ónimdi qalyptastyrýǵa qosqan úlesi 30%, AQSh-ta 40%, TMD elderinde ol 10-15%-dy quraidy. Búginde áleýmettik-ekonomikalyq damýdyń sapalyq sipattamalary alǵa shyǵýda", - dep atap ótti oblys ákimi.
Atap óteiik, ótken jyly Aral aýdanynda apattyq mektepterdiń ornyna 6 jańa bilim uiasy salynǵan bolatyn. Oblysta sońǵy 5 jylda 45 bilim oshaǵy, onyń 37-si apattyq mekteptiń ornyna salyndy.
Sonymen qatar, búgin oblys ákimi Araldaǵy apatty úilerdiń ornyna berilgen 27 jeke úidiń turǵyndarymen kezdesti. Turǵyndar aimaq basshysyna tez arada turǵynúi máselesin sheship bergeni úshin alǵystaryn bildirdi. Eske sala keteiik, aǵymdaǵy jyldyń naýryz aiynda oblys ákimi turǵyndarmen kezdesip, ekiqabatty apatty úileriniń ornyna jańa turǵynúiler salynatynyn aitqan edi. Joǵaryda atalǵan otbasylar qyrkúiek aiynda jańa baspanaǵa ie boldy. Ár úidiń aýmaǵy 60 shm jáne turmystyq qajettilikterine arnalǵan qosalqy ýchaskeleri bar. Barlyǵyna jaryq júrgizilip, sý tartylǵan. Sondai-aq, merdiger kompaniia óz qarjysy esebinen tabiǵi gaz júrgizip, kógildir otynmen jylytatyn pesh ornatyp, jerseriktik televiziiasyna qosyp berdi.
