Sońǵy 5 jylda orman kólemin arttyrý úshin oblystyq biýdjet esebinen orman molyqtyrý jumystary júrgizilip keledi. Bul týraly Úkimet otyrysynda Qyzylorda oblysynyń ákimi Gúlshara Ábdiqalyqova aitty, dep habarlaidy "Ult aqparat".
«Oblys aýmaǵynda memlekettik orman qorynyń kólemi 6,5 mln gektardy qurasa, onyń 3,1 mln gektary – ormandy alqaptar. Ormandy alqaptyń 89%-yn negizgi orman quraýshy sekseýil aǵashtary alyp jatyr. Sońǵy 5 jylda orman kólemin arttyrý úshin oblystyq biýdjetten orman qoryna 55 myń gekterǵa orman molyqtyrý jumystary júrgizilip, onyń 26,3 gektary Aral teńiziniń qurǵaǵan ultanyna egildi», - deidi Qyzylorda oblysynyń ákimi Gúlshara Ábdiqalyqova.
Onyń aitýynsha, biýdjetten tys qarjy kózderin tartý arqyly ekologiialyq jobalar júzege asyrylýda.
«mysaly, Koreia Respýblikasynyń qaitarymsyz 1,7 mln AQSh dollary qarjysyna Aral teńiziniń qurǵaǵan bóligindegi 13,3 gektar jerge 5 mln sekseýil otyrǵyzyldy. Sonymen qatar, Dúniejúzilik banktiń qaitarymsyz 4,3 mln AQSh dollar qarjysy esebinen josparlanyp otyrǵan «Qazaqstan landshaftaryn qalpyna keltirý» jobasy aiasynda Aral teńiziniń qurǵaǵan ultanyna fito-orman melioratsiiasy jobasyn jalǵastyrý jóninde Ekologiia, geologiia jáne tabiǵi resýrstar ministrligine usynys engizdik», - deidi ol.
