Terrorizmmen kúreste ádebietten tiimdi qarý joq. Aziia qalamgerleriniń I forýmynda saýdiialyq jazýshy Iýsef Ál-Mohaimid osyndai pikir bildirdi, dep habarlaidy "Ult aqparat".
Pushcart ádebi syilyǵynyń laýreaty Iýsef Ál-Mohaimid «Ádebiettiń terrorizmmen kúrestegi róli» degen taqyrypta baiandama jasady.
«Din men ádebietti bir-birine qarsy qoiý – kóneden kele jatqan qasiret. Ótken ǵasyrda da ádebietti tunshyqtyrýǵa talpynystar kóp boldy. Tipti, tarihta Nobel syilyǵynyń iegerin óltirý áreketteri de tirkelgen. Arab áleminde bolǵan terroristik oqiǵalar ádebietten de kórinis taýyp jatyr. Saýdiialyq aqynnyń jankeshtilikke arnap jazǵan romany ádebiettiń terrorizmge qarsy ekenin kórsetti. «Kútpegen túngi oqiǵa» siiaqty súbeli týyndylar da osy terrorizmge qarsy jazyldy. Aýǵan jazýshysy Haled Hosseini de ádebiet álemine osy saryndas shyǵarmalarymen tanyldy. Ádebiet - dinnen azat, tolerantty qundylyq», - degen arab qalamgeri Saýd Arabiiasynda ádebietke qalai kóńil bólinip jatqanyn aitty.
«Saýd Arabiiasynda jazýshylar ádebiet pen jýrnalistikanyń damýyna kóp úles qosty. Buqaralyq aqparat quraldary men jýrnalistikalyq birlestikterdiń kóbi ádebiet ókilderiniń kúsh salýymen qalyptasty. Búgin arab áleminde ádebiet terrorizmge qarsy turýǵa tyrysyp jatyr. Ony oqý baǵdarlamasynan ysyryp, jyldar boiy ádebiet pen mýzykaǵa mektepte tyiym salyndy. Sonyń bárin «islam ádebieti» degen shymyldyqpen búrekemeledi. Biraq shynaiy ádebiet ómir súrip jatty. Sońǵy bes jylda bizdiń ádebiette alǵa jyljý bar. Tipti, 2030 jylǵa arnalǵan strategiiamyzda ádebiet jetekshi oryn alyp tur. Qazir romandar men povester mańyzdy únge ainaldy. Osylaisha ádebiet negativti, haiýandyq júiege ymyrasyz kúres jariialap otyr. Despotizm basqaratyn álemde internet pen áleýmettik jeli arqyly jazýshylardyń ekinshi tynysy ashyldy. Beibitshiliktiń jalǵyz kilti ádebiette. Ádebiet – terrorizmmen kúres jolyndaǵy eń tiimdi qural ekenin kórsetip otyr», - dedi .
