Almaty mektepterinde onlain sońǵy qońyraý syńǵyrlady. Esten ketpeitin erekshe shara týraly Iaasaýi atyndaǵy №123 mektep direktorynyń oqý isi boiynsha orynbasary, Bek Air ushaq apatynda aman qalǵan Nazym Abaǵanova Mamyrbekqyzy oiymen bólisti, dep habarlaidy QazAqparat.
Onyń aitýynsha, karantin aiasynda 2 ailyq onlain bilim berý formaty eldegi bilim salasy úshin úlken synaq boldy.
«Onlain bilim berý bolashaqtyń enshisindegi dúnie bolǵanmen, búgin erteń keleri anyq edi. Alaida aiaq astynan osy formatqa kóshý bizder úshin úlken tájiribe bolǵany ras. Ekinshi jaǵynan jańa júieniń kemshilikteri, olqy tustaryn paiymdadyq. Onlain oqytýdyń qandai tiimdi tustary baryn, álde de qai jaǵynan damytý kerektigin túsindik. Bul úlken jumys, aýqymdy shara – muǵalimderdiń eńbegin aiqyn kórsetti. Oǵan kóptegen ata-analarymyzdyń hattary, habarlamalary kýá bola alady. Mektep qabyrǵasynda júrgendei bolmasa da, barynsha bilim nárimen sýsyndatýǵa tyrystyq. Bul jerde balanyń obektivti bilim alǵany tek muǵalimge bailanysty emes, ata-ananyń da múddesi bolyp tabylady. Kóptegen ata-analar balalarynyń biliminiń qai jaǵynan basymdyq berýin túsindidep oilaimyn», - dedi Nazym Abaǵanova.
Pedagog mektepterdegi sońǵy qońyraýdyń mańyzdylyǵyn da atap ótti. 38 jyl boiy bilim salasynda qyzmet etip kele jatqan Nazym Abaǵanova oqýshylaryna betpe-bet jyly lebiz bildire almaǵanyna kóńili bosaitynyn aitty.
«Sońǵy qońyraýda barlyǵymyzdyń kóńilimiz bosaǵany anyq. Ár synyp Zoom qosymshasy arqyly jeke-jeke sońǵy qońyraý sharasyn ótkizdi. Bizdiń mektepte 2500-den asa oqýshy bilim alyp jatyr. Al mektepti 98 bala bitirip, qanatyn qaǵyp úlken ómirge joldama alyp jatyr. Olardyń attestat alý saltanaty maýsymnyń 3-4 kúnderine josparlanǵan. Epidemiologiialyq talaptarǵa sáikes 50 baladan asa jinalýǵa bolmaityndyqtan, biz attestat tapsyrý sharasyn 2 kúnge bóldik. QR BǴM buiryǵyna sáikes, úlken aýditoriia, merekelik saýyq keshteri bolmaidy», - dedi Nazym Abaǵanova.
