Ataýly áleýmettik kómektiń jańa túri elimizdiń úsh óńirinde 21 myń teńgeden artyq bolady. Sebebi ol jerlerde kúnkóristiń deńgeii joǵary, dep habarlaidy QazAqparat tilshisi.
QR Eńbek jáne halyqty áleýmettik qorǵaý vitse-ministri Svetlana Jaqypovanyń aitýynsha, 1 sáýirden bastap kópbalaly otbasylar úshin taǵaiyndalatyn járdemaqynyń kólemi árbir balaǵa 20 789 myń teńge bolady. Atalǵan kórsetkish barlyǵyna ortaq. Biraq úsh óńirde esep-qisap basqasha júrgiziledi.
«Qazir statistikany ashyp qarasańyz, bizde úsh óńirde kúnkóris deńgeii basqasha. Ol - Astana, Almaty men Mańǵystaý oblysy. Osy úsh óńirde járdemaqy sál joǵarylaý bolady. Qalǵan oblystarda árbir balaǵa 20 789 teńgeden tólenedi», - dedi S.Jaqypova QazAqparat tilshisine bergen suhbatynda.
Aita keteiik, buǵan deiin QR Eńbek jáne halyqty áleýmettik qorǵaý ministri Berdibek Saparbaev Astanadaǵy ataýly áleýmettik kómektiń kólemin jariialaǵan bolatyn.
«Ataýly áleýmettik kómekke kelsek, Memleket basshysy naqty tapsyrma berdi, buryn januianyń árbir múshesine tabysty eseptegende (kúnkóris minimýmnyń - avt.) 50 paiyzdyń deńgeiinde bolsa, endi ony 70 paiyzǵa kóbeitedi. Eger buryn 14 849 teńge bolsa, 1 sáýirden bastap onyń kólemi 20 789 teńgege kóteriledi. Al endi Astana qalasynda basqa óńirlermen salystyrǵanda ortasha jalaqy joǵary, sondyqtan 21 698 teńgege deiin kóteriledi. Bizdiń boljamymyz boiynsha osy sharamen, kem degende, 830 myń qazaqstandyq qamtylady. Al Astana qalasynda, bul kem degende, 6 700-ge jýyq», - dedi B.Saparbaev Astanadaǵy kópbalaly analarmen bolǵan kezdesýde.
Aqpannyń sońynda Nur Otan partiiasynyń XVIII sezinde QR Tuńǵysh Prezidenti - Elbasy Nursultan Nazarbaev kópbalaly otbasylarda árbir balanyń tólemaqysyn 21 myń teńgege deiin arttyrýdy tapsyrdy. Osydan keiin Elbasy atalǵan sharalardy 1 sáýirden bastaýdy mindettedi.
